Despues di tres aña bandona:
ORANJESTAD (AAN): Den un paso historico pa restaura dignidad di representacion oficial di Aruba na Hulanda, Gabinete AVP/Futuro a aproba un decreto ministerial pa inicia cu e renobacion oficial di Arubahuis – e cede oficial di Gabinete di Minister Plenipotenciario di Aruba na Den Haag.
E anuncio importante a wordo haci pa Minister Gerlien Croes, durante su prome bishita oficial na Hulanda. Den presencia di e personal actual di Gabinete di Aruba y su Directora Joselin Croes, Minister Croes a anuncia oficialmente e bon noticia cu gran orguyo y emocion. Reforsando e compromiso di e gobierno pa restaura dignidad y funcionalidad na un edificio cu ta simbolico pa pais Aruba.
Arubahuis, como un edificio historico y patrimonio nacional, a keda bandona pa casi tres aña, despues cu su condicion a deteriora te na punto cu empleadonan no tabata sigur mas trahando den e edificio. E situacion a forsa e personal pa bandona e edificio y opera for di un oficina provisional cu no ta actualmente apto pa e nivel di representacion diplomatico cu Aruba merece.
“Esaki no ta solamente un renobacion fisico, pero un restauracion di respet pa nos pais y e hende cu ta representa Aruba cu orguyo. Un oportunidad nobo pa duna contenido nobo y debido na traha riba nos relacion y cooperacionnan den reino”, Minister Gerlien Croes a destaca.
Minister Gerlien Croes a confirma cu e renobacion mester keda cla den 2026, y cu e fondo destina ta un realidad, danki na colaboracion di varios departamentonan gubernamental na Aruba. Minister Geoffrey Wever y Prome Minister Mike Eman tambe a firma e decreto corespondiente, y Minister Croes tabata tin e honor di haci e anuncio publicamente y duna e noticia directamente na e empleadonan.
E emocion y alivio tabata visibel den cada persona presente. Directora Joselin Croes a expresa su gratitud profundo na tur cu a traha pa yega na e dia aki:
“Esaki ta un momento di union y logronan comparti. Nos ta gradici Gobierno di Aruba pa kere den e importancia di nos representacion na Hulanda”.
Cu e renobacion di Arubahuis, Aruba ta reafirma su presencia den Reino Hulandes – cu dignidad, vision y compromiso pa un miho futuro pa nos tur.
