Minister di Husticia a anuncia proyecto di renovacion di Huis van Bewaring di Guarda Nos Costa

ORANJESTAD (AAN): Diaranzon mainta durante un conferencia di prensa dilanti di ‘Huis van Bewaring’ di Guarda Nos Costa (GNC), minister di Husticia Rocco Tjon a anuncia un proyecto grandi di renovacion, cu ta nifica un inversion substancial.

“E renovacion ta pa amplia e capacidad caminda personanan indocumenta ta wordo ubica, pero hopi importante tambe ta cu ta bay tin inversionnan specifico pa loke ta e circunstancianan di trabao di e personal”, segun e mandatario.

El a sigui bisa cu e oficina principal ta bay wordo renova, unda cu lo crea un espacio tambe caminda cu personal di GNC por haci nan trabao bao di mihor circunstancianan.

Segun Tjon, e proyecto aki ta acopla tambe na un proyecto di ICT, caminda cu ta bay percura cu e personal cu ta traha na GNC ta bay tin un sistema automatiza cu cual nan por traha y haci nan trabao.

“E bunita di e proyecto ey ta cu e ta ACTPOL pero specificamente e module pa loke ta trata e cadena di extranheria”.

ACTPOL manera ta conoci ta e sistema automatiza cu Cuerpo Policial tambe ta uza, pues di e forma aki ta percura cu e dos departamentonan aki por ta mas mihor sincroniza y mas mihor gelink na otro.

Di e forma ey mas mihor nan por comparti informacion cu otro, segun e minister.

Tjon a indica tambe cu luna pasa a firma un protocol/MoU entre Guarda Nos Costa y Rode Kruis pa di e forma aki tambe brinda Rode Kruis acceso na e facilidadnan, pa na momento cu tin un keho cu ta wordo haci, Rode Kruis mes por drenta y wak e circunstancianan bao di cual e personanan ta wordo ubica.

“Mester bisa cu Gobierno a asumi su responsabilidad y a haci e inversionnan, pero na final di dia ta keda tambe un responsabilidad di cada persona cu wordo ubica akinan, pa percura pa mantene e condicionnan den bon forma”, segun e mandatario kende a duna un pabien na D.O.W y Albo, cu ta bay ta e compania cu ta bay ehecuta e proyecto.