Gobierno Mike Eman nunca a ripara algo robez cu tereno? --- *E supuesto neishi di haraña di Benny Sevinger tabata invisibel? --- *Cuanto placa Aruba a perde y lo exigi pa placa perdi bolbe den caha?
ORANJESTAD (AAN)- E caso Avestruz ta mucho mas serio cu loke por a spera for di momento cu Ministerio Publico a cuminsa actua contra sospechosonan cu awor ta acusado den e caso criminal cu Huez ta atende.
Preguntanan serio ta bini dilanti. Preguntanan, cu ta afecta henter e sistema di funciona di gobernacion di Aruba, cu mester duna Pueblo e confiansa cu ta na interes di Pueblo ta wordo goberna.
Ora scucha tur e sumanan di Miyones y Miyones cu lo a pasa di un man pa otro, e prome pregunta ta, con por ta posibel cu tur transaccion por a tuma lugar.
Pa cuminsa mester splica Pueblo e cuadro legal pa un persona haya un tereno y cuanto placa ta envolvi den cada transaccion.
Ora un persona bati na porta pa e haya un tereno, kico ta pasa?
Si tuma nota di loke e ciudadano comun y coriente mester pasa aden pa e haya un tereno di Gobierno, ta parce cu e caminda ta basta dificil.
E lista largo di persona cu mester di un tereno, no ta desconoci, pero nan mester para den fila.
Aki mester cuminsa atende cu e caso contra Benny Sevinger y su grupo cu segun Huez ta un neishi di haraña.
Un neishi basta grandi di personanan conoci na Aruba, cu awe mester atende cu Huez.
Con nan a atende cu Benny Sevinger? Con e proceso a bay y con tur documento a wordo regla?
Ta trata di propiedad di Gobierno y un caminda mester tin mas hende cu a ripara cu algo ta completamente robez.
Den Partido AVP nunca un hende a bati alarma cu tabata tin conexion “special” entre Benny Sevinger y miembronan importante di partido y hasta personanan cu por considera inversionista?
Ministerio Publico y tur cu tabata parti di e investigacion, por a crea un storia asina grandi contra personanan y instancianan conoci den comunidad?
Pregunta y mas pregunta mientras nos ta puntra nos mes con por ta posibel cu Partido AVP no tabata sa nada di e caso aki.
E caso aki ta sumamente grave pasobra e ta mishi cu Aruba como Estado di Derecho caminda Ley ta dicidi kico ta derecho di cada ciudadano cu no conoce preferencia segun Ley.
E pregunta ta keda cuanto un hende mester paga pa haya un tereno di Gobierno y pakico Benny Sevinger como Ministro mester tabata envolvi den otorgamento di tereno cu no ta asunto di Benny Sevinger, cu mester a controla e Departamento cu ta otorga tereno y cu tabata cay bou su responsabilidad.
Benny Sevinger y e “santonan” den su partido, cu ta mustra dede riba tur hende, no tabata ripara cu cosnan tabata bay robez?
Cuanto placa a lora den e caso aki? Cuanto placa mester a lora segun ley?
Pregunta y mas pregunta ta realidad den e caso aki cu pa haci husticia na Aruba na nos parecer, mester mira sumanan halto bolbe den caha di Gobierno di Aruba di parti di tur hende cu por a haci nan mes culpabel den e caso aki.
Ta na Huez pa dicidi culpabilidad. Pero ora mira cu pa Un Miyon cu a wordo paga na un boet, mester conclui cu algo a pasa cu e paga e boet aki y cu Ministerio Publico a scrap nomber di e acusado pa aparece dilanti Huez caminda mester bini dilanti ainda si e tabata envolvi.
Unda Partido AVP tabata? Nan no a tende? Nan no a mira? Nan no a papia nada?
E abogado di Benny Sevinger mes a bisa cu “algo a pasa”. Awor no ta spera pa haya sa kico a pasa exactamente y con ta atende cu e asunto aki, cu mescos cu e Caso Fondo Desaroyo Nobo San Nicolas ta kibra tur confiansa cu un ciudadano votador por tin den e sistema politico y e Estado di Derecho di Aruba, caminda aparentemente mester papia di selva di tres macaco, un avestruz y un haraña.
