Aruba den e suspenso cu na 1961 Cuba a crea dilanti costa Mericano --- *”America for di Americans” y e Union Sovietico cu Rusia mester --- *Situacion mundial un potpourri di fragmento silencia di Siglo 20
ORANJESTAD (AAN)- E sucesonan mundial actual, no ta nada sorprendente. Den realidad e situacion di conflicto actual ta resultado di desaroyonan cu a habri y cera Siglo 20, cu a wordo marca pa un secuencia di guera y expansionismo cu a bira realidad hasta den porta di Aruba na Venezuela cu entrada di Chavez.
Siglo 20 ta un secuencia di guera cu a nace di guera y a parce di a relaha despues di añanan sesenta ora mundo a cuminsa ocupa su cabez mas cu economia pa sigui produci armanan cu ta e motibo cu situacionnan sumamente explosivo, a haya un solucion/
E bomnan atomico cu a resona na mundo y cu a marca fin di Segunda Guera Mundial, a laga mundo atras den un guera friu, cu a permiti rayonan di solo haci como sifuera e peliger di guera a termina.
Ora Union Sovietico a yega na su fin y Alemania a unifica na final di Siglo 20, un guera diferente a continua den expansionismo cu mundo no por controla.
Awe mundo ta tuma nota di loke por yama e herencia historico, cu a wordo silencia den situacionnan mundial, cu nunca a wordo resolve.
Basicamente filosofianan politico di Siglo 20, nunca a muri.
Na paisnan democratico, nan presencia visibel ta subi y baha cu e lidernan cu ta na poder.
E punto directo di e conflicto actual ta e hecho cu Vladimir Putin no tin e poder cu un lider di Union Sovietico tabata tin.
Union Sovietico a bira un cantidad di estado, manera Ukraine cu awe Vladimir kier conkista.
Ukraine ta un peliger pa Vladimir Putin, cu si Ukraine bira miembro di Union Europeo y uni na NATO, mester atende cu un forsa militar poderoso, di su enemigo militar, na su frontera.
Cada pais cu tabata pertenece na Union Sovietico y bira parti di Union Europeo, ta un menasa mas grandi pa intentonan pa rebiba loke tabata Union Sovietico cu e poder cu e tabata tin.
E Union di Europa ta un peliger enorme pa Rusia sigur si tene na consideracion cu por papia di e base di un nacion ora papia di Union Europeo, cu su propio moneda, su pasaporte y su Parlamento y forsanan militar uni.
Un peliger cu a crece durante Siglo 20, mientras Rusia tabata conkista e continente Mericano, cu a exigi Merca contesta.
E maneho enfrente relacionnan cu exterior di Merca, te ainda ta hancra den e doctrina di Monroe, cu ta “America for di Americans”.
Ta cu e doctrina aki a rechasa colonialismo na e continente Americano loke a habri porta pa expansionismo di comunismo y poder Ruso hasta den porta di Estados Unidos, cu ta Cuba.
Den e situacion cu a presenta su mes, Europa y Gran Bretania a uni aunke Inglatera no ta parti mas di Union Europeo, loke por a spera ora mira historia di Britannia, cu a “rule the waves” na su manera y a bira refugio di Europa den Guera Mundial.
Awe Presidente Frances, Macron, a pone su mes disponibel pa busca un solucion. E papel cu Francia ta desplega awe, ta e papel cu e tabata tin na final di Segundo Guera Mundial cu invasion di Europa domina pa Hitler.
Ta na Francia e liberacion di Europa di regimen di Hitler a cuminsa pa finalmente tropanan di aliado pone un fin na Hitler y Segundo Guera Mundial.
Asina ta yega pues na e scenario actual, cu un diferencia. E poder di Rusia, cu a hiba e bataya grandi di Leningrad contra Hitler pa despues e Guera Friu cu a crea dos Alemania, dos Berlin, tene mundo ocupa.
Dilanti costa di Aruba tin e regimen di Nicolas Maduro, directamente uni cu Cuba, e satelite militar di Rusia dilanti costa di Merca, cu na 1961 a crea e suspenso cu awe mundo ta sinti na Ukraine ora na 1961, Merca a trata di invadi e fortalesa Ruso den Caribe!
