Minister di Enseñansa ta desea  tur alumno, maestro y esnan den campo di Enseñansa un aña escolar exitoso

ORANJESTAD (AAN): Minister di Enseñansa y Deporte Endy Croes a splica cu e siman aki e aña escolar nobo, esta aña escolar 2023-2024 lo inicia.

Como Minister di Enseñansa ta desea tur alumno, pero tambe tur maestro un aña escolar exitoso.

            Minister Croes ta sigui splica cu Enseñansa ta e fundeshi di un pais. Enseñansa ta e motor di un pais y ta hopi importante pa e desaroyo profesional y personal di nos hobennan y di cada conciudadano.

            Enseñansa ta e yabi pa forma un comunidad competente y asina hunto crea un miho sociedad. Minister Endy Croes ta encurasha tur mayor pa sigui guia, motiva y inspira boso yuinan pa haci nan maximo esfuerso na scol.

            Splica nan tur dia continuamente e importancia di enseñansa. Alabes, ta termina deseando nos maestronan y tur esnan den e campo di enseñansa hopi pasenshi, amor y sabiduria pa e aña escolar nobo.

            Nos ta orguyoso di bosonan y masha danki pa contribui den e desaroyo di Pais Aruba. Boso trabou ta altamente aprecia.