Consumidornan ta buscando maneranan eficiente pa spaar placa ora di bay supermarket

Con pa spaar placa a bira e reto di hopi ciudadano

*Ola di inflacion ta afectando rond mundo

ORANJESTAD (AAN):  Den e dianan aki por a mira con hopi hende a cuminsa keha riba e aumento di prijs di hopi producto na algun supermercado. Hopi ta tira culpa riba BBO na frontera, mientras cu otronan ta probecha di kico cu por pa hisa prijs.

            Banda di e echo cu ya caba e situacion di hopi ciudadano no ta nada bon pa loke ta salario y situacion laboral, awor mester cuminsa atende cu aumentonan di prijs na hopi negoshi.

            Mientrastanto, kico anos como consumidor por haci? Unico cos cu por haci aworaki ta wak for di unda por cuminsa spaar. Pesey lo ta bon pa check algun conseho cu expertonan ta duna pa asina spaar placa ora di bay supermercado.

            Ademas di cumpra menos, hopi hende ta busca maneranan di uza nan placa mas eficasmente y probecha loke nan tin, specialmente awor cu, segun datonan, parce tin un ola di inflacion rond mundo.

            Parce cu por mira cu e pronosticonan economico no ta cos di gaba pa loke ta 2024 y e consumidornan mester cuminsa prepara pa atende cu loke por bira 'awanan turbulento' riba tereno di finansanan personal.

            Esaki ta algun di  e consehonan cu algun experto ta duna:

1. Tira un bista riba loke tin caba na cas: Pesey ta importante pa ora di bay supermarket pa check den bo frigidair, bo muebel di cushina prome cu bay haci compras. Tur hende sa e balor di traha un lista, pero si cada biaha bo ta agrega productonan na e lista sin tene cuenta cu bo tin e producto ey caba, e ora bo lo gasta mas placa den cosnan cu no mester.

            No tin sentido cumpra mas boter di ketchup di bo tin cinco caba den e kash'i cushina.

2. Bay prome na e seccion di descuentonan: Expertonan ta recomenda cambia e strategia di haci compras ora di drenta supermarket. E recomendacion ta pa bay prome na e seccion unda tin e descuentonan of ofertanan.

            Si bo ta haya algo cu ta den bo lista, ya caba bo a logra spaar algo di placa. Tambe ta sugeri pa bay directamente na e seccion di productonan congela (den freezer) y despues den e seccion di productonan den bleki.

            Carni, pisca y berdura congela casi semper lo ta mas barata cu e opcion di productonan fresco. Eynan caba por logra algun forma di spaar di manera significativo. 

3. Haci un mihor uzo di bo freezer: Algo comun den varios pais ta cu na e hogarnan ta desperdicia hopi cuminda, perdiendo hopi recurso economico cu por wordo probecha.

            E expertonan ta sugeri pa haci un miho uzo di e freezer locual por yuda reduci drasticamente e restonan di cuminda. Si e productonan ta yegando na nan fecha di vencimento, semper por purba pone nan den freezer na luga di benta nan afo.

            Tambe por cumpra productonan mas barata cu nan fecha di vencimento ta den yega. Productonan manera lechi, keshi, inclusive fruta y berduranan, cu por wordo congela y warda pa ora cu mester di nan. Cu esaki por haci un sorto di pauze den nan fecha di expiracion pero no uz'e como un solucion pa almacena a largo plazo. 

4. Scoge e mehor forma di warda nan: Hopi di loke nos ta cumpra na supermarket ta bin paketa pa e comodidad di e 'display' na e supermarket, pero no pa e comodidad di e consumidor.

            Por ehempel, e 'mushrooms' ta bin cu un capa di plastic cu ta descompone den nan paki. Nan ta wordo poni asina pa mas facilidad ora di transporta. Tin expertonan cu ta recomenda pa pone e producto aki, ora di yega cas, den un saco di papel y kita e capa di plastic lo yuda pa e producto por dura un tiki mas y no daña lihe.

            Tin cosnan cu por haci pa e productonan por dura mas, specialmente, e berduranan fresco y e saladanan, cual ta e grupo di alimentonan cu mas ta wordo benta afo.

            Un triki ta pa pone un papel absorbente (paper towel) den un saco habri di salada pa absorba e humedad, locual lo yuda cu su duracion.

            Banda di esaki, mantene e frutanan den e frigidair tambe lo yuda extende nan periodo di bida. Mescos cu corta chikito e ciboyo, promenton y otro berduranan. Pone nan den un saco, segun porcion, pone nan den freezer cla pa ora cu mester uza nan.

            Ta recomendabel pa check tambe e temperatura di e frigidair y mantene esaki na e temperatura adecua pa asina e alimentonan no daña lihe.

            Esaki ta entre otro, algun recomendacion di loke por tene na consideracion ora di bay supermarket y di como por almacena e productonan na cas.