Minister di Deporte a aproba continuacion di proyecto di instalacion di luz pa veldnan deportivo

ORANJESTAD (AAN): Minister di Deporte, mr. Gerlien Croes, a confirma aprobacion pa continuacion di e proyecto di instalacion di luz na veldnan deportivo.

E ta un proyecto cu Lotto pa Deporte ta cargando financieramente. E iniciativa ta parti di un vision mas amplio pa consolida e infrastructura deportivo y pa crea espacio sigur, accesibel y cu ta motiva pa organisa mas actividad fisico den tur bario.

   Despues di un evaluacion di e prome fase di e proyecto, cu a inclui instalacion exitoso di iluminacion na varios veld, Minister Croes a aproba dia 20 di mei ultimo e siguiente fase cu lo inclui un cantidad adicional di tres veld cu lo beneficia di miho iluminacion. Esaki lo permiti uso mas prolonga y sigur di e veldnan, tanto pa entrenamento como pa competencia, den oranan di anochi y ora cu visibilidad naturalmente ta limita.

   E siguiente tres veldnan cu lo ta na turno pa haya luznan nobo riba veld lo ta veld di RCA Arena, SV Riverplate y SV Nacional, segun e aprobacion cu Minister Gerlien Croes a duna 20 di mei ultimo. E proyecto ta wordo ehecuta den colaboracion cu Lotto pa Deporte y cu apoyo tecnico y logistico di partner strategico.

"Nos ta kere firmemente den e poder di deporte pa uni comunidad, formacion di nos ciudadanonan, stimula un estilo di bida saludabel y crea oportunidad pa desaroyo personal y colectivo. Iluminacion ta un parti esencial di esaki, y nos ta compromete pa sigui inverti den e infrastructura cu nos deportistanan merece”, Minister Croes a subraya.

   E continuacion di e proyecto ta anticipa pa cuminsa den e proximo lunanan, cu enfoke riba sostenibilidad, eficiencia energetico y durabilidad di e instalacionnan. Minister Croes a conclui cu un yamada na comunidad pa sigui cuida y haci uzo di e espacionan deportivo sanamente.