Den un situacion mundial preocupante pa economia y base social
*Spion Venezolano a admiti participacion den terorismo di droga
*Salida di Carvajal for di Aruba a bira un mancha pa Aruba na Merca
ORANJESTAD (AAN) — Na momento cu situacion mundial ta empeorando manera DIARIO continuamente ta adverti y asina bienestar y economia di Aruba ta na peligro, un bom a rementa na momento cu e criminal Venezolano Hugo Carvajal a admiti na Merca, cu e ta participante na narco trafico y mundo criminal.
Na nivel internacional e informacion cu pa basta tempo tin atencion mundial, a plama rond mundo y incluso for di Hulanda y Merca, DIARIO a wordo informa di e forma con nomber di Aruba tabata wordo menciona como pais cu a debolbe e criminal su libertad.
Pa pone Aruba na haltura di pasado cu den tanto desaroyo fastioso a marc historia ultimo temponan, mester bay na e momento cu alarma a wordo bati na Aruba pa presencia di Hugo Carvajal na Aruba.
Carvajal durante hopi tempo a wordo busca dor di Gobierno Mericano, pa terorismo asocia cu crimen di droga.
Hugo Carvajal tabata director di e servicio militar Vdenezolano pa informacion y lo tabata forma parti di un grupo peligroso cu ta trafico den cocaina y tabata haci uzo di gueriyeronan na Colombia.
Segun acusacion di Merca el a percura pa entrada di cantidad enorme di droga na Merca.
E tabata Hefe di Servicio di Informacion di Gobierno Venezolano y ta wordo considera como un persona sumamente peligroso.
“El Pollo”manera e tabata wordo yama, tabata tin un relacion fuerte cu Hugo Chavez y Nicolas Maduro.
Pa Aruba el a bira ineresante na 2014, ora el a wordo deteni ariba peticion di Merca pero a logra haya su libertad pa motibo di e hecho cu el a wordo considera representante diplomatico di Venezuela.
DIARIO cu luho di detaye a informa Aruba di e situacionnan entre otro na momento cu Fiscal Mayor di e tempo Peter Blanken a bolbe Hulanda despues di un periodo di cinco aña na Aruba.
Blanken a mustra cu Aruba semper a tene su mes na tratadonan cu e tin cu entre otro Merca. Den e cuadro aki Carvajal a wordo deteni na Aruba a base di un peticion di Merca cu a persigui Carvajal pa crimen tambe relata na negoshi infernacional di droga.
Semper Aruba a honra peticionnan di Merca pero den e caso aki e hecho cu Carvajal tabata wordo asocia na servicio diplomatico di Venezuela, a pone den libertad, loke a causa cu nomber di Aruba te awe ta den publicidad mundial negativo, sigur despues cu ayera el admiti na Merca, su culpabilidad den e crimennan pa cual e tabata wordo persigui y busca dor di Merca.
Na 2021 porfin el a cay den man di husticia Mericano y ayera den tratamento di su caso na Merca a admiti su culpabilidad, loke a bira un bofta den cara di Aruba.
Informantenan a indica na DIARIO, cu e suceso a tuma lugar hustamente na un momento cu ya e situacion mundial ta preocupante.
Tur informacion cu a circula ayera riba e hecho cu el a admiti su culpabilidad na Husticia Mericano, cu a ricibi asistencia di Spaña pa su captura, tabata informa con el a logra bandona Aruba contra e peticion di Merca.
Manera ya bisa autoridad di Aruba a tene su mes na e hecho cu e tabata parti di mundo diplomatico Venezolano y cu Aruba a tene su mes na e relacion diplomatico den e caso aki.
E forma cu e informacion a plama ayera sin duda ta wordo lamenta dor di informantenan di DIARIO na nivel internacional debi na e impacto internacional di e noticia y e forma cu e ta mishi cu e cara di Aruba den e persecucion di criminalidad internacional sigur relata na tur e investigacionnan mundial contra regimen di Nicolas Maduro.
