Damara Rasmijn, relacionista publico
ORANJESTAD (AAN): Damara Rasmijn, relacionista publico di Directie Ouderenzaken a elabora den un entrevista cu DIARIO cu mescos cu otro paisnan, Aruba no ta un excepcion, no tin hopi cifranan concreto relaciona cu Abuso di Adultonan Mayor, specialmente riba e tipo di abuso cu nan por ta experencia.
Directie Ouderenzaken a cuminsa sinta cu diferente instancia pa bin cu un meldpunt, na unda adultonan mayor por denuncia e abuso cu nan ta pasando aden, pero segun Rasmijn, nan no kier djis lanta un meldpunt, y nada ta sosode. Pa e motibo aki, nan ta reuniendo cu diferente instancia pa asina por sigui cada caso y asina por yega na un solucion.
E parti di concientizacion den comunidad ta sumamente importante, pasobra nan por ta testigo di un abuso di adulto mayor. Cualkier persona cu sa of tin informacionnan relaciona cu un caso di abuso di un adulto mayor, por acerca Directie Ouderenzaken y nan lo percura pa yuda cu esaki.
Directie Ouderenzaken lo keda trece mas tema importante relaciona cu Adultonan mayor y por tuma contacto cu Directie Ouderenzaken 2805004.
