Minister di Asunto Social a entrega certificado di fase 1 na cursistanan di SVT-20

ORANJESTAD (AAN): Minister di Asunto Social, señora. drs. Melvin Wyatt-Ras, hunto cu Minister President señor. mr. Mike Eman,

a entrega certificado na 8 hoben cu a completa fase 1 di e Sociaal Vormingstraject (SVT-20).  E grupo a cuminsa su trayecto dia 19 di augustus y a finalisa cu exito 4 luna intensivo di disciplina, guia y desaroyo personal.

Cursistanan cu a completa fase 1 di SVT-20: Ponson, Werleman, Kock, Ridderstaat, Tromp, Tromp, Hazel y Yarzagaray.

Durante fase 1, cu a tuma luga na Marinierskazerne Savaneta bou supervision di Team O&T di Korps Mariniers, e hobennan a siña disciplina, responsabilidad y determinacion. Nan a confronta reto y a desaroya confiansa den nan mes pa sigui cu un rumbo positivo.

Cu e logro di fase 1, e cursistanan di SVT-20 lo drenta awor fase 2 di nan trayecto,
den cual nan lo core stage na companianan local: un paso esencial pa haya experiencia laboral y sigui nan desaroyo personal y profesional.

Minister Wyatt-Ras a felicita e hobennan y a enfatisa cu nan esfuerso ta habri caminda pa un futuro mas sigur:

“Nos ta celebra balentia, crecemento y un deseo sincero pa tuma un direccion nobo den bida. E hobennan di SVT-20 a prueba cu disciplina y perseverancia ta habri porta pa oportunidad.”

Minister Wyatt-Ras tambe ta gradici e ekipo cu a guia e grupo durante fase 1:
Kapitein Ligtvoet, Sergeant Croes, Sergeant Leito, Sergeant Corvacho, Korporaal Thijsen, Korporaal Arendsz, Marinier Koolman, tambe Coordinadora Jessica Ras y Trahado Social Nicole Godett di Formacion Social.

“Mi kier gradici tur mentor y profesional cu a guia e hobennan cu pasenshi y dedicacion. Boso aporte ta fundamental pa e exito di nos hobennan.”

Den un palabra personal dirigi na e grupo, e Minister a conclui:

“Pabien di curason. Keda firme y sigui kere den bo meta. Aruba ta orguyoso di boso.”

Minister Wyatt-Ras a subraya cu SVT a demostra su balor den cambia bida, y ta stimula mas hoben pa considera e programa y pa inscribi pa e siguiente trayecto cu lo cuminsa na maart 2026.