Minister Dangui Oduber notando cu RIU ta sigui haci inversionnan grandi den renobacion  

ORANJESTAD (AAN): Diaranson mainta Minister di Turismo y Salud Publico sr. Dangui Oduber a bay na RIU Palace Antillas y Riu Palace Hotel caminda a ricibi un recorido.

E mandatario a worde ricibi na un manera masha caluroso pa e Manager Regional di Riu Hotels sr. Juan Blanco conhuntamente cu e dos Gerente General di ambos Hotel y demas staff.

   Minister Oduber a keda masha impresiona cu su bishita. Riu ta un compania cu tin un impacto grandi riba nos turismo y nos economia. Nan ta conta cu mil empleado di cual hopi ta Arubiano. Durante e recorido Minister Oduber a topa cu varios Arubiano cu a haya oportunidad na Riu Hotel pa por desaroya nan mes den e compania.

   Locual ta importante pa menciona ta cu Riu Hotel ta comprometi pa sigui haci inversion den locual ta e mehoracion di su propiedadnan. Recientemente Riu a caba di haci un inversion di 40 miyon Dollar. Esaki ta pa upgrade, drecha y renobacion di tur e cambernan den Riu Antillas. Awor Riu ta bolbe bay haci un otro inversion quantioso di 40 miyon Dollar, e biaha aki ta pa Riu Palace.

Segun Minister Oduber di e manera aki Riu Hotel ta demostra no solamente nan compromiso sino nan confiana den e maneho cu ta worde hiba. Un maneho cu ta dunando resultado caminda Aruba ta bay registra un di e mihor añanan pa cu turismo den nos historia.

   E mandatrio a keda masha contento di e recorido cu el a ricibi den ambos hotel. Riu hotel ta un hotel di calidad y di 5 streya. Locual ta importante ta cu nan a comenta cu nan ta zorg pa nos localnan haya e cuponan di trabao.

Finalmente e Minister Dangui Oduber ta gradici sr. Juan Blanco y su staff pa e bunita recorido. Gobierno ta desea Riu Hotel tur clase di exito pa futuro, un hotel cu sigur a contribui grandemente na Aruba su economia.