Relacionista Publico di BCI Robby Rosel:
ORANJESTAD (AAN)— Relacionista Publico di Bureau City Inspector, Robby Rosel, a aclarea den entrevista cu DIARIO, cu e accion di limpieza cu lo cuminza diasabra awor den e contexto di e campaña “Limpi Limpi” y ponemento di baki den e distritonan, San Nicolas prome, ta solamente pa sushi domestico, kiermen e no ta conta pa comercio.
Kiermen, e accion aki ta estrictamente pa cas. E kier a trece esaki pa dilanti pa e personanan no haci dos biahe y no presenta cu trucknan grandi. “Nos ta acepta solamente pick up, trailernan chikito di cas, baki unda bo ta lastra e desperdicionan di cas. No presenta loke ta azeta di auto of di cushina, ni cu articulonan cu ta di comerciante. Comerciante no ta participa den esaki pasobra esaki ta solamente pa e comunidad di Aruba, pa e habitantenan por haci nan lugar limpi, y tira e sushinan cu nan tin afo”, Rosel a señala.
Tambe zorg pa trece e sushinan separa for di cas, ora e persona ta bezig ta ruim op, y si tin sea frishider bieu, heronan, of otro aparatonan electrico cu ta pa tira afo, trece nan y despues bo ta bolbe bay cas trece loke ta desperdicionan domestico, mata, etc. Pa cada un tipo di sushi tin un baki.
