Juf. Susette lo representa Maria College y Empire Carnival Group den Carnaval 70 como Señora Carnaval

ORANJESTAD (AAN):  Despues di algun aña Maria College t’ey bek pa engrandece nos Carnaval, y e biaha aki a team up cu Empire Carnival Group pa haci esaki realidad.

E idea pa Maria College participa bek den Aruba su Carnaval a nace durante preparacion pa e jump up escolar na februari ultimo, y riba e mainta di e jump up directorado di Maria College Mavo a anuncia na su team di colega cu juf. Susette Wernet- Besselink ta Maria College su Señora Carnaval.

            Na “Mi Dushi Casibari” den ambiente di brassband Level Up y Songo Music band a tuma lugar e coronacion di Juf. Susette y asina esaki a bira oficial pa pueblo di Aruba na unda cu juf. Susette lo bay representa Maria College y Empire Carnival Group den Carnaval 70 como nan sra. Carnaval.

            Juf. Susette ta hopi conoci bou di (ex) studiantenan y mayornan como cu e ta fungi como secretaria di Maria College desde aña 1999. Juf. Susette tambe tabata ex studiante di Maria College. Semper cu hopi pasenshi y cu un sonrisa riba su cara juf. Susette ta cla pa yuda su scol y motiva sea un colega, alumno of mayor ora cu mester. Na 2018 juf. Susette a lanta “Get Fit Team” na unda diferente colega y conocirnan ta topa otro pa cana den naturalesa, participa na eventonan deportivo y social of haci zumba bou guia di su mesun persona.

            Hunto cu Get Fit Team juf. Susette ta organisa eleccion di Reina y Prins cu Pancho “Get Fit”. Desde chikito tambe juf. Susette semper a gusta carnaval y tabata participa na diferente eventonan carnavalesco hunto cu tanchi Shi Preke, cu por cierto ta e prome sra. Carnaval di Aruba. Sin laga afo juf. Susette a forma parti di e team di Maria College cu a yuda prepara nos ex alumno Maria Wouter kende na aña 2018 a bay competi pa Reina Hubenil di Carnaval 64 y a logra bay cu e titulo maximo.

            E biaha aki tambe comision “Su Fundraising” a start sali caba pa asina recauda fondo pa cu e preparacionnan pa eleccion di sra. Carnaval. Dia 3 di september di 10:00 am - 2:00 pm lo tin e prome fundraising na feria cultural Centro di Bario Brazil unda cu lo tin un tent di bende sopi, pan cu keri keri, kala y cos dushi.

            Team di Maria College hunto cu Empire Carnival Group ta conta cu apoyo di nan studiantenan, coleganan y henter pueblo di Aruba pa asina apoya juf. Susette Wernet- Besselink cu lo representa nos scol den Carnaval 70!