Minister Dangui Oduber a haci un interesante presentacion di e “Master Plan Seroe Colorado”

ORANJESTAD (AAN) – E conferencia di prensa di gobierno, Diahuebs di e siman aki, a tuma lugar den e conocido Kulture Café, den e Distrito di San Nicolas,

cu presencia di Minister di Salud y Turismo, Dangui Oduber, ken a elabora tocante e Master Plan di Seroe Colorado.

E mandatario a referi na un presentacion cu a tuma lugar di loke nan ta yama e “Master Plan di Seroe Colorado” pero cu de facto, ta e Plan Integral di e Proyecto Baby Beach fase -2 y tambe e Proyecto di Rodgers Beach.

Minister Oduber a menciona cu algun aña pasa caba, gobierno a cuminza cu un proyecto na Baby Beach, cu mester a bira un solo proyecto na aña 2018, pero pa motibo di e pandemia esaki a wordo parti den fase 1 y fase 2.

E dignatario a splica cu e fase 1 ya caba a wordo entrega y ehecuta y fase-2 ta loke a cuminza cune despues di e pandemia a pasa, y cu e situacion a conoce un mehoracion pa loke ta trata e fondonan cu tabata tin disponible pa e proyecto Baby Beach, fase 2. Un bez cu a cuminza cu e discusionnan a inclui e proyecto di Rodgers Beach, pa hacie un Plan Integral, cu nan ta yame “E Master Plan di Seroe Colorado”.

E mandatario a señala cu esaki ta un bunita proyecto pa mehora e infrastructura, percura pa tin landscaping, amenities, bañonan, y espacio pa parkeo den e area aki.

“E ta un bunita proyecto cu nos a percura pa presenta awe. Nos, di parti di Gobierno a institui un Comision mixto di turismo y infrastructura, pa e guia tur e proyectonan cu tin di haber cu infrastructura, den cuadro di mehoracion di producto Aruba pa mantene competitivo”, e dignatario a bisa.

 E ta kere cu ta necesario pa keda haci inversionnan necesario pa Aruba por keda competitivo contra tur e competidornan di e region. El a subraya cu e area di Seroe Colorado na San Nicolas, semper a haya gobierno su atencion, y semper tabata un prioridad pa Gabinete Wever-Croes 1 y 2.

“Ta pesey e Comision aki a cuminza haci diferente tarea caba, pa prepara e diferente proyectonan. Awe nos a haya importante pa presenta e Master Plan aki, na San Nicolas Business Asociation (SNBA) cu a wordo consulta tambe cu e plan aki. Nos a presenta e concepto algun tempo atras, y splica nan kico ta e idea. Nos a invita nan awe tambe pa nan duna nos nan feed back, y nan pensamento riba e desaroyonan aki. Tambe nos a invita DNM, den cuadro di proteccion di nos naturaleza, y tambe Parke Nacional Arikok, pa asina nos por scucha kico ta nan pensamento y nan opinion tocante e dos proyectonan aki, cu mi ta kere ta proyectonan importante pa San Nicolas, pa su desaroyo economico y turistico”, e dignatario a señala.

E proyecto Baby Beach fase 2 lo mester inicia e aña aki, y tur e documentonan pa ehecuta e destaho publico ta den preparacion. Lo bin un area completamente nobo di parkeo cu landscaping nobo. Den e areanan cu tabata wordo uza como canchanan di tennis lo traha un restaurant y dos kiosco chikito, pa asina por tin diferente amenities, pa abarca e necesidadnan no solamente di hende local, pero tambe di e turistanan.

Minister Oduber a reitera cu e areanan aki ta sumamente bunita, considera un joya, y cu lo wordo desaroya na e momentonan aki teniendo cuenta cu e desaroyonan cu tin na caminda.