Accidente mortal di Prinses Diana ta prueba di necesidad di regla --- *Caso registro di votado a duna prueba di buraconan habri den ley --- *Libertad di prensa y media social mester bolbe na nan origen oficial
ORANJESTAD(AAN)—E introduccion di un mediaraad, un conseho cu ta pone base pa funcionamento di prensa, ainda ta na discusion.
DIARIO a duna su opinion riba e introduccion di un “mediaraad”, reglanan pa funcionamento di prensa, cu den futuro por wordo hasta mal usa dor di personanan cu awe ta grita contra “mediaraad” pero lo haci bon uzo di e posibilidad pa tapa boca di protesta y nan contrincantenan.
DIARIO a sigui su propio investagacionnan y a sigui busca opinion publico riba un medaya cu tin dos banda cu ningun hende por nenga y cu hasta ta mustra cu mester bolbe na e interpretacion oficial di “libertad di prensa” pa asina prensa tambe haci su trabou segun e motibo pa cual “libertad di prensa” a wordo introduci.]
Libertad di prensa no a wordo introduci como un arma pa un grupo di hende por bira poderoso pero hustamente pa proteha e totalidad di un poblacion, un pais, contra abuso di poder dor di cualkier persona of grupo.
Interesante ta, cu ora sondea pensamento general, ta descubri cu hopi hende tin miedo di personanan cu ta traha den prensa y ta uza prensa pa nan haya poder, cu segun democracia nan no tin.
Un informante a presenta nos un portret di e morto di Prinses Diana, cu na su parecer mester wordo uza ora ta papia di libertad di prensa y e abuso cu ta wordo haci di e derecho sagrado aki.
Morto di Prinses Diana a wordo ocasiona dor dor abuso di libertad di prensa, dor di periodistanan cu kier usa benta di sensacion pa nan bienestar personal.
“Prensa por ta un peliger si e ta den man robez,” a wordo splica na DIARIO.
Prensa ta atende cu e pensamento general di un Pueblo y ta influencia opinion di e lectornan.
E parti peligroso aki di e tarea di prensa no tabata e motibo cu a introduci prensa, cu mester a bira e arma di Pueblo pa busca na prome lugar e bienestar di Pueblo y no situacionnan den cual abuso por wordo haci di hende.
Privacidad di un ciudadano ta un derecho basico.
Pruebanan palpabel ta wordo presenta na DIARIO.
Un persona ta bay un fiesta priva y e proximo dia ta mira su portret den ambiente priva den corant.
Un ciudadano ta pensa cu tin un ladron pafor di su cas y ta busca asistencia di Polis. Prome cu autoridad yega, ya a saca portret di su propiedad, su cas, y su yamada a bira noticia.
Informantenan a indica na DIARIO cu esaki no ta libertad di prensa. Na paisnan democratico grandi, tin regla pa saca portret di propiedad y di hende y pone esaki den publicidad.
Tarea di prensa den un comunidad ta, pa defende e bienestar di un ciudadano, cu ta wordo bon informa di loke ta bon y malo pa ciudadanonan y pa totalidad di e comunidad.
Paisnan democratico conoce reglamento legal cu ta defende bida priva di e ciudadano.
Durante eleccion 2021 a keda demostra cu Huez no a acepta pa informacionnan personal di un ciudadano, di acuerdo cu reglanan di privacidad, wordo entrega na mundo politico pa evita manipulacion politico di ciudadanonan.
Informantenan a mustra riba e peliger cu tin actualmente cu abuso di publicacion di informacion personal di hende riba medianan social, caminda sin permiso di e persona en cuestion ta publica retrato y informacion.
“No por limita Libertad di Prensa, cu mester evita abuso di e ciudadano contra forsa opresor. Sinembargo Libertad di Prensa no por conduci na kiebra di dignidad di hende, abuso di bida priva di hende, pa un grupo di persona bira poderoso y gana placa cu informacion priva di hende,” a wordo splica na DIARIO.
E Derechonan Humano ta papia un palabra cla y ta contra abuso di periodismo pero tambe di cualkier Ley contra Libertad di Prensa, cu por wordo abusa dor di cualkier persona cu awe ta hari cu Pueblo cu intencion di trapa riba hende si den futuro e haya poder.
