ORANJESTAD (AAN): Desde 1999 Fundacion Telefon pa Hubentud Aruba pa medio di su servicio ta duna informacion, opcion y sosten emocional na mucha y hoben di Aruba.
Pa haci esaki Fundacion Telefon pa Hubentud Aruba ta haci uzo di diferente instrumento manera: telefon, email, chat, website, charla, workshop y proyecto.
Den 2021 pa medio di e instrumentonan aki tabatin 13.689 contacto cu Telefon pa Hubentud. E contactonan tabata di mucha, hoben, mayor y profesionalnan.
E servicionan di Telefon pa Hubentud ta ser brinda di dialuna te cu diadomingo. E tres lunanan di mas contacto cu e servicionan di Telefon pa Hubentud ta Juli cu 4.002 contacto, september cu 2.074 y maart cu 1.973 contacto.
E motibonan pa cual un persona por ta den contacto cu e servicio di Telefon pa Hubentud ta diferente. Algun di e temanan ta ‘Situacion na Cas’, ‘Violencia’, ‘Informacion’, ‘Comunicacion’, ‘Derecho di Mucha’ etc. Den 2021 tambe e mucha, hoben, mayor y profesionalnan tabata den contacto cu Telefon pa Hubentud pa diferente motibo.
E top 5 di e motibonan pa kico a tuma contacto cu Telefon pa Hubentud den 2021 ta: Informacion (10.244 momento di contacto), Violencia (838 momento di contacto), Problema mental (655 momento di contacto), media social (401 momento di contacto) y Norma y Balor (274 momento di contacto).
Di 13.689 contactonan den 2021, 2.355 tabata hende homber, 2.888 tabata hende muher y di 8.446 e sexo no a wordo identifica.
Den aña 2020 door di e Pandemia di Covid-19 mester a para diferente training cu tur aña ta wordo duna na e mentornan di Telefon pa Hubentud.
Den aña 2021 a sigui cu tur e trainingnan. Asina aki den luna di mei 2021 a logra duna un grupo di persona e training basico di mentor y asina aki a amplia e cantidad di mentornan cu ta esnan cu ta duna e asistencia na telefon, email y chat. Banda di e training basico atrobe por a organisa ‘Deskundigheidsbevordering Dag’ ‘Ningun Grito den Silencio’.
E tema di ‘Deskundigheidsbevordering Dag’ tawata salud mental. Ariba e dia aki e training ser duna pa profesionalnan di Respaldo, Bureau Slachtofferhulp di Korps Politie Aruba en Psymia. ‘Reflectie Weekend’ cu tambe ta un di e training cu e mentor ta ricibi tur aña. Durante ‘Reflectie Weekend’ a concentra ariba e salud mental di e mentornan mes, pa asina aki nan por keda duna servicio di calidad na e muchanan, hoben y adolescentenan di Aruba.
Banda di e mentornan, e personal di Fundacion Telefon pa Hubentud Aruba tambe a sigui diferente curso. Asina e personal a sigui COMBI (Communication for Behavioral Impact) training y Codigo di Proteccion.
Den 2021 como un ‘Kenniscentrum’ Fundacion Telefon pa Hubentud Aruba a exporta conocimiento na organisacionan gubernamental y no-gubernamental den region. Organisacionan na cual Fundacion Telefon pa Hubentud Aruba a comparti conocimento den 2021 ta Child Helpline International durante e CHI Regional Space 2021 ariba 17 di maart.
Fundacion Telefon pa Hubentud Aruba por medio di su presidente a organisa e consulta y comparti conocimento. Tambe durante e ‘Regional Consultation of Child Helplines in the Americas and Caribbean’ ariba 24 y 25 di november 2021, Fundacion Telefon pa Hubentud Aruba a comparti informacion tocante e impacto di e Pandemia di Covid-19 ariba e salud mental ariba mucha, hoben y adolescente.
Durante ‘No Mas No More’ cu ta un conferencia cu ta trata e temanan di violencia contra hende muher, violencia domestico y derecho di mucha, y a tuma lugar na Bonaire di 29 di november pa 2 di december, Fundacion Telefon pa Hubentud Aruba a ser invita pa comparti conocimento tocante e best practices cu Telefon pa Hubentud ta uza pa asina aki duna servicio na e mucha, hoben y adolescente na Aruba.
Un gradicimento ta bai na Setar N.V, Web Aruba N.V y Aruba Airport Authority N.V. pa e sosten den aña 2021 na e vision, mision y e trabaonan di Fundacion Telefon pa Hubentud Aruba.
Pa mas informacion tocante tur e trabaonan cu Fundacion Telefon pa Hubentud Aruba por tuma contacto cu Fundacion Telefon pa Hubentud Aruba via Facebook of telefon 5886138/ 5884011.
