Minister Dangui Oduber a anuncia e siguiente fase di mehoracion di Baby Beach y Rodgers Beach

ORANJESTAD (AAN) – Minister di Turismo y Salud, Dangui Oduber, a yama un conferencia di prensa cu a tuma lugar na San Nicolas,

na haltura di ex-Tennis Court na Esso Club, banda di Baby Beach, pa anuncia e siguiente fase di e proyecto di Baby Beach.

“Manera ta conoci Ministerio di Turismo, conhuntamente cu ATA, Departamentonan di Infrastructura y Ministerio di Infrastructura, a anuncia, durante Gabinete Wever-Croes 1, un master plan pa mehoracion di infrastructura, upgrading, embeyecimento, percura pa tin iluminacion y landscaping. Pues, un master plan integral. Pa ehecuta esaki, lamentablemente a bin  e pandemia y nos a haya dos aña di retraso, y esaki ta haci cu nos mester a pone den fase e diferente proyectonan cu nos a anuncia e tempo ey”, Minister Dangui Oduber a menciona.

El a reitera cu e intencion tabata pa mehora e area di Baby Beach y di Rodgers Beach. Esaki tabata na 2019 y na 2020 e pandemia a surgi, y esey a pone cu mester a dividi e proyecto di BB den tres fase. “Fase 1 a wordo entrega caba na Juni 2021 cu tabata e pida caminda desde e cruzada cu ta bay Rodgers Beach of Baby Beach, y traha algun espacio pa parkeo.

Fase 2 nos a anuncie dia 25 di Augustus di e aña aki, den un conferencia di prensa, cu ya caba e destaho publico a tuma lugar, y e proyecto a cuminza caba”, Oduber a relata.

El a sigui splica cu esaki tabata pa traha un parkinglot. Pa organiza y restructura esaki miho lo bin un rotonde den e cruzada. Lo percura pa tin iluminacion pa bay Baby Beach of Rodgers Beach y tambe un bunita landscaping cu matanan di coco y diferente vegetacion, den henter e area aki.

Pa loke ta trata e di tres fase di e proyecto ta encera e construccion di dos kiosco; lo mester move e turtle wall un tiki mas patras, teniendo en cuenta cu e desaroyonan cu tin cu ta e hotel Secrets y e Hotel Boutique, cu lo wordo traha den e ex-Esso Club, ta bay mas volumen di hende cu ta bay bishita e area aki ademas di nos localnan cu regularmente ta bin. Esey a pone cu a tuma e decision pa move e turtle wall, pa asina haya mas espacio riba e santo blanco pa e beach bira mas grandi, y tambe ta bay reconstrui e trapinan cu ta ubica den e parti aki pa conecta e area aki cu ariba di e seroe na Seroe Colorado. Pa ultimo, lo percura pa drecha tur e canchanan deportivo pa percura pa nan ta multifuncional. E intencion ta pa tin dos cancha di tennis. Manera ta conoci, antes tabata tin cuater cancha y ta bay reconstrui dos y e otro dos lo percura pa funciona como uso mixto di beach volley, beach soccer y beach tennis.   

E dignatario a duna di conoce, cu den e lugar unda e conferencia di prensa a tuma lugar, lo bay tin un “onderhandse aanbesteding” pa construi un restaurant cu por ofrece cuminda y bebida na e bishitantenan. Esaki ta un desaroyo cu sigur lo tin un balor agrega enorme, pa e area di Seroe Colorado, specialmente Baby Beach y Rodgers Beach.