Despues di diez aña cu Algemene Rekenkamer Aruba a adverti
- Cuenta Anual 2013 a adverti pa e bom cu awe ta rementa
- E dolor di recuperacion financiero for di estado di bancarota
ORANJESTAD(AAN)- Un cadena di reunion ta wordo hiba na e momentonan aki dor di Prome Ministro di Aruba, mr. Evelyn Wever-Croes y Ministro di Asuntonan Financiero, mr. Xiomara Maduro, cu instancianan Hulandes.
E tema central ta e suma di 900 Miyon cu na 2023 Aruba mester pone riba mesa como pago di e debe cu el a haci cu Hulanda y cu mester ta paga na 2023.
E dolor di recuperacion financiero for di estado di bancarota ta loke mester keda presenta na Gobierno di Hulanda y di Reino, cu na vispera di un crisis mundial marca pa recesion na 2023, lo mester haci posibel pa Aruba por soluciona e problema grandi di pago di e debe.
Pa expertonan e reunionnan cu ta tuma lugar na Hulanda actualmente, no ta nada nobo ya cu for di 2013, Gobierno di Mike Eman a wordo adverti pa e bom cu awe ta rementa.
Uno di e reunionnan cu mas a bini dilanti cerca expertonan financiero di Aruba, ta e encuentro entre e delegacion di Gobierno di Aruba cu Algemene Rekenkamer di Hulanda.
E reunion aki a hiba e informantenan di DIARIO na e realidad cu na 2013, Algemene Rekenkamer di Aruba a bati alarma grandi pa e futuro financiero di e pais debi na e forma cu na 2013 e maneho financiero tabata wordo hiba.
E “cuenta anual” di Aruba ta dicidi con a atende cu e placa di Aruba, a base di e presupuesto cu ta copilacion di gastonan y entrada na cual gobernacion di un pais mester tene su mes.
Algemene Rekenkamer Aruba na 2014, ora e cuenta anual di 2013 a wordo presenta, a splica cu no ta cumpli cu Ley a base di cual por gasta placa di Pueblo cu aprobacion di Parlamento di e pais.
Den e presentacion di e cuenta annual 2013, ta wordo mustra cu e bon maneho financiero di e pais ta un condicion sin mas pa Gobierno por cumpli cu su tareanan y pa Parlamento cumpli cu su tarea pa controla e maneho financiero cu Gobierno ta hiba.
Contraloria General di Aruba (Algemene Rekenkamer Aruba) diez aña pasa, a splica cu gasta mas placa cu ta pone den presupuesto ta algo ilegal, cu tin resultado financiero desastroso pa Aruba.ene Rekenkamer Aruba a presenta na 2013 ta realmente, a keda constata na 2020 ora ya gobierno a conoce cambio y for di 2018 medidanan a wordo tuma na Aruba pa gastonan ta basa riba e entrada di e pais, cu den un bon gobernacion no tin debe, pero reserva pa confronta problemanan financiero, cu na 2020 a rementa den man di Aruba como resultado di e pandemia causa pa Covid-19.
Diez aña despues cu Algemene Rekenkamer Aruba a adverti pa e maneho di crea debe, awe Gobierno di Aruba ta bishita Algemene Rekenkamer di Hulanda durante e bishita pa yega na un solucion pa e debe di 900 Miyon cu Aruba mester paga na 2023 y Aruba no tin.
Den e encuentronan na Hulanda, uno di e puntonan mas importante na fabor di yudansa pa Aruba, ta e forma cu Gobierno Wever-Croes por demostra cu e ta practica un maneho financiero cu ya ta duna resultado pa Aruba, cu a cuminsa conoce recuperacion.
Sinembargo, asina mes Aruba no por cumpli cu pago di 900 Miyon na 2023 y hunto cu Hulanda mester yega na un solucion.
Na 2020, e situacion financiero di Aruba a causa expresionnan serio di Raymond Knops, e Secretario di Estado encarga e tempo cu Relacionnan den Reino, cu a mustra cu Aruba ta den ‘estado di bancarota” a base di e maneho cu a wordo hiba den pasado.
Informantenan a indica cu e razon cu awe tempo ta duna na Algemene Rekenkamer Aruba como organo di control financiero mas halto di e pais, lo conduci na e hecho cu e advertencianan y guia di Algemene Rekenkamer Aruba den su relatonan, lo haya mas atencion den mundo politico, cu mester respeta e Ley di Contabilidad, den cual e maneho financiero di Aruba ta hancra.
