Minister Croes ta felicita Muchila Creativo cu a organisa un Bazaar di Pasco sumamente bunita

ORANJESTAD (AAN): Recientemente Minister Endy Croes a bishita e ‘Christmas Charity Bazaar’ cu a tuma luga di Caya Grandi organisa pa Fundacion School Muchila,

cu ta un scol secundario pa nos hobennan special. ‘E tabata un atardi hopi ameno yena cu ambiente di Pasco y talento di nos hobennan’, e mandatario expresa.

            E hobennan di e scol a toca y canta canticanan di Pasco. Tambe por a admira presentacion di un hoben cu a toca caha di orgel y wiri simultaneamente. Durante e bazaar di Pasco a bende bela, chuculati y cuadranan traha p’e studiantenan mes.

            E mandatario a cumpra varios cuadra pinta y traha door di e hobennan mes y asina duna sosten n’e proyecto.  

            Durante e evento tabatin oportunidad pa haya mas informacion di e scol. Minister Endy Croes ta gradici di pa e invitacion y e caluroso recepcion.

            Alabes ta felicita Muchila Creativo specialmente nos hobennan cu a organisa un Bazaar di Pasco sumamente bunita y exitoso.