Prome Minister preocupa cu e di 5 ola di Covid-19:
ORANJESTAD (AAN) – “Ainda no tin motibo pa panico, pasobra tin algun bon noticia, ora ta trata di Omicron”, Minister Presidente Evelyn Wever-Croes a expresa den conferencia di prensa, di actualizacion di e desaroyonan di Covid-19 y aumento di casonan e ultimo dianan aki.
Na prome lugar, cu Omicron ta un variante menos severo y lo conduci na menos hospitalizacion. Ta wordo papia di entre 30% cu 70% menos hospitalizacion. Tambe e ta keda, aparentemente, menos dia activo.
“Si nos tuma tur esaki tume den contexto mes, ban no lubida cu Delta ta un di esnan cu a haci nos mas daño, cu hopi mas hospitalizacion, y cu si nos sigui e trend cu nos ta bayendo den algun dia nos lo ta dos of tres biaha mas hopi di loke nos a haya den Delta. Pesey nos ta preocupa”, e dignatario a reitera.
El a agrega cu na e momentonan aki no tin ningun hende hospitaliza den Cuido Intensivo na HOH, pa loke ta covid, sinembargo e cantidad cu tin aworaki y loke gobierno ta proyecta pa e siguiente dianan, por pone cu e capacidad na Hospital ta yena hopi lihe, cu por ta un preocupacion grandi.
“Manera Hospital mes a splica e problema no ta solamente cama, sino tambe e personal. Generalmente na Aruba, na e momentonan aki caba, varios doño di trabao ta experenciando cu hopi trahador ta, sea positivo den aislamento of den cuarentena, y esey ta paralizando operacion y nos mester proteha hospital, di esaki tambe”, e dignatario a bisa.
Prome Minister a señala cu mester frena e desaroyo aki awo, pa evita cu lo yega na e punto cu hospital ta yen y no por duna cuido; mester frena esaki na bienestar di cada persona y su propio famia.
“Nos no ta bay di e leu ey ainda, di un lockdown of toque de queda, pero si nos ta tuma cierto pasonan pa limita e riesgonan. Akinan, constantemente, nos ta busca e balansa den proteccion, cuido di salud di nos hendenan na Aruba, economia, y e necesidad cu hendenan tin pa distrae nan mes, pa nan salud mental”, Prome Minister a remarca.
