ORANJESTAD (AAN) – Minister di Salud Publico señor Dangui Oduber, a señala den conferencia di prensa, cu Aruba ta confrontando hopi reto.
El a menciona cu tin retonan logistico y di personal na Hospital, tin reto di acomodacion pa e turistanan na momento cu nan ta test positivo, nan tin cu wordo ubica den otro acomodacion, y na momento cu e turistanan a test positivo e ultimo dianan aki, esaki ta trece un reto adicional cune, pasobra no tin hopi acomodacion mas. Pues tur esakinan ta retonan logistico cu gobierno mester deal cune, pa motibo di e contagio halto y pesey tabata necesario pa introduci e medidanan pa trece un cambio, pa asina frena e cantidad di casonan cu tin na e momentonan aki, y maneha esaki na e miho forma posible y surpasa e peak cu gobierno ta atendiendo cune aworaki.
E dignatario a menciona cu loke por a nota e dianan aki tambe, ta cu tin un panico pa test na Aruba. El a bisa cu tur hende kier test pa wak si nan ta positivo of no. “Nos maneho di test semper tabata dirigi riba personanan cu tin sintoma, ora un docter di cas traha un 'verwijsbrief' pa un persona cu tin sintoma cu por duna indicacion cu e ta positivo pa covid. Gobierno no ta recomenda personanan cu no tin sintoma pa haci e test. Si bo ta cuminza sinti sintoma, isola bo mes y si bo ta sinti e necesidad pasobra e sintomanan a bira mas, e ora ey nos ta recomenda bo pa bay test, pasobra mi no ta kere cu e intencion ta pa henter Aruba bay test”, e mandatario a bisa.
Minister Oduber a comenta cu Diamars tabata tin mas di 1600 hende cu a bay haci e test y obviamente nan mester a ricibi nan resultado Diaranzon, y el a bisa cu sigur lo tin un cantidad di test positivo atrobe.
Finalmente e mandatario a reitera cu Aruba a confronta varios reto como gobierno y como Crisis Team, y esaki ta e di cinco ola y a sa di tuma semper e decisionnan, poniendo e balansa entre salud, economia, turismo, y tur e otro interesnan cu mester a tene cuenta cune, y un bez mas gobierno a trata na un manera hopi responsable posible, pone tur cos den perspectiva, den un bon balansa, y tuma e miho decision pa tur hende na Aruba.
“Mi ta convenci cu nos ta bay surpasa e di cinco ola aki, y cu nos ta bay progresa despues di e di cinco wave aki, y cu positivismo nos tin cu habri aña 2022. No ta facil pa gobierno y crisis team loke nos ta confrontando, y naturalmente nos no a spera cu mester a bay deal asina hopi caso net e dianan festivo di aña, cu ta bin un variante cu ta contagia asina lihe. E situacion a presenta y nos mester deal cune pero nos tin e conviccion cu hunto cu nos comunidad, cu lo mester tene su mes na e reglanan, celebra cu cautela. Laba bo man frecuentemente, purba mantene distancia, bisti bo tapaboca continuamente, pa asina hunto nos logra surpasa e di cinco ola aki, y habri aña 2022 cu hopi optimismo”, e dignatario a conclui.
