“Lo siña yuda bo mes den bo salud mental
ORANJESTAD (AAN) – Den conferencia di prensa, Julissa Ras, di Paper Sisters, a hiba palabra den conferencia di prensa, tocante e tayer di trabao cu lo tuma lugar dia 28 di Juni awo, tocante salud mental, y cu ta titula: “Journaling”.
El a splica cu Sisters ta un bookstore Café, na unda nan ta brinda nan clientenan, no solamente un lugar unda nan por bay relaha nan mes pero tambe cumpra nan material pa yuda den salud mental.
“FADA a acerca nos pa nos duna e workshop y hinca tur cos den otro, cual ta speakernan, esun cu ta bay duna e tayer di trabao cu ta mi mes persona, y asina nos por papia di nos experiencia personal cual ta ‘Journaling’ con bo por use pa bo beneficio di bo salud mental, y con e por yuda bo diariamente p’asina relaha bo mes y relaha bo mente” Julissa a indica.
E dia aki, 28 di Juni, lo cuminza cu hendenan papiando di nan experiencia cu Journaling, kico nan ta bende, con nan ta ofrece ayudo, pero tambe con FADA por yuda cu salud mental.
Durante e dia aki Papers Sisters lo provee tur hende cu nan Journaling, cu un coleccion di papers cu nan tin cu a traha pa FADA, y manera semper nan ta haci, nan ta enfoca riba salud mental. “Nos ta hacie tambe pa enfoca riba Papiamento, motivando, inspirando y empoderando hende, cu nos palabranan na Papiamento”, Julissa a comenta.
El a agrega cu e cuponan ta limita y e participacion ta mara na un prijs, y tur cos ta inclui den e prijs.
El a menciona cu Journaling ta un tool cu tur hende por uza, y no tin un edad pa cuminza cu esaki, con bo ta skirbi den bo diario.
“Nos ta bay hacie e dia aki mas simpel y facil pa yuda abo haya e bos di bo mes pa cuminsa Journaling, y con pa us'e na beneficio di bo salud mental. Ami ta kere hopi di con papiando cu bo mes y haciendo bo mente un tiki bashi y un tiki mas claro tambe, por yuda bo p’asina tur bo problemanan interno cu bo tin, journaling por yuda bo”, Julissa a reitera.
“Nos ta interesa tur hende di 13 aña di edad bay ariba, cu ta interesa pa presenta na e workshop aki”, Julissa a expresa.
