Minister Besaril na Universidad di Leuven pa lanzamento buki riba leynan social den paisnan chikito

ORANJESTAD (AAN): Informacion for di Den Haag ta indica cu Minister Plenipotenciario Guillfred Besaril tabata invitado di Katholieke Universiteit (KU) di Leuven pa

e presentacion di e buki “Social Security Law in Small Jurisdictions” (Leynan riba e systema di seguridad social den paisnan chikito).

   E presentacion tabata na encargo di profesor Danny Pieters di e facultad “Small Jurisdictions Research Group” cu a haci e investigacion. E buki ta analisa e pregunta cardinal: si encase paisnan chikito ta enfrenta problemanan specifico den brinda seguridad social y con pa trata cu e problemanan aki.

   Tambe e investigacion a concentra riba e punto con e grandura di e pais ta afecta e leynan pa cu e systema di seguridad social.

   Pa contesta e preguntanan aki, a investiga den e prome capitulo di e buki puntonan cardinal di paisnan chikito y seguridad social manera ta conoci den literatura actual.

   E investigacion a duna atencion na e relacion entre seguridad social y e ley cu ta regla esaki. Den un di dos capitulo a investiga e caracteristiconan mas importante cu paisnan chikito ta enfrenta pa despues concentra riba e aspectonan cu ta relevante pa e seguridad social di e paisnan.

  E di dos parti di e buki a enfoca riba e sistema di seguridad social den 20 paisnan chikito, entre nan e paisnan den Reino Hulandes, Curaçao, St. Maarten y Aruba.

   E investigacionnan aki a conduci na e investigadornan di KU Leuven pa saca conclusionnan riba e pregunta cardinal, pero tambe pa test e validez di e literatura actual. Den e parti final di e buki a formula algun sugestionnan con pa trata cu e sistema di seguridad social na paisnan chikito.

   Banda di e presentacion di e buki “Social Security Law in Small Jurisdictions” tambe a papia riba un proposicion pa bin cu un proyecto riba educacion avansa den paisnan chikito. Meta di e proyecto aki ta pa mira con pa haci cu educacion avansa ta mas accesibel localmente, tanto na comienso como na final. Asina e hobennan por haya educacion avansa cerca di cas, prome cu nan tuma e paso pa bay na un pais grandi, manera Hulanda of Belgica. Como ehempel di con esaki por traha bon a haci referencia na e cooperacion entre KU Leuven y Universidad di Aruba cu e facultad STEM (Science, Technology, Engenering and Mathematics). E estudio aki ta di asina indole cu studiantenan cu sigui e estudio aki, por subi mercado laboral facilmente.

   Minister Besaril a probecha di e oportunidad aki pa gradici KU Leuven pa e cooperacion cu Universidad di Aruba y asina stimula hobennan Arubiano pa sigui un estudio na Aruba mes. Segun e mandatario esaki por ta instrumental pa evita un “brain-drain”, pasobra hecho ta cu un grupo grandi di studiante Arubiano cu bin studia na Hulanda, no ta regresa nan pais. Y mas largo e studiante keda Hulanda, mas dificil ta pa e regresa, tabata e declaracion di Minister Plenipotenciario Guillfred Besaril.

   E potretnan ta cortesia di Cas di Aruba.