Prome Hefe di Redaccion di DIARIO Jenny Cratz
Por describi un persona, mester uni impresionnan cu el a crea y a laga atras.
Ya cu sigur den e Pandemia di Covid-19 tur intento ta dirigi riba “economisa”, mi ehercisio pa describi Jossy Mehsen Mansur, ta limita na 500 palabra.
Mi prome impresion di Jossy Mansur tabata, cu e ta un persona cu ta lucha pa alcansa su proposito.
Mi a topa Jossy Mansur pa prome bez dilanti mi porta di cas na Curaçao na 1982.
Nos a papia di DIARIO cu a mira luz como prome corant di Aruba y tabata tin mester di un Hefe di Redaccion.
Pa hobennan comprende e situacion unico, mi mester splica cu na 1982 Aruba tabata lucha pa Status Aparte, despedida di Curaçao caminda mi a nace y tabata traha como Hefe di Redaccion.
Mi prome impresion di Jossy Mansur tabata cu e tabata tin curashi. Mi a bisa “no”.
Destino a dicidi. Corto tempo despues mi omo a muri na Aruba y mi a topa Jossy na entiero caminda el a invita mi pa bishita DIARIO prome cu mi bolbe Willemstad.
Mi segundo impresion di Jossy Mansur tabata, cu e ta insisti.
Pero algo a pasa.
Aunke dos di mi tres omonan tabata biba na Aruba cu nan famia, e hecho cu mi bida adulto pa un parti tabata na Merca y Hulanda, a haci cu mi no tabata conoce Aruba bon.
Entiero di mi omo a introduci mi na e calor humano di Aruba. E forma cu Jossy a introduci mi na DIARIO, tabata contene algo mas cu “trabou”.
Mi tercer impresion di Jossy Mansur a bira, e alma Arubano.
Jossy Mansur tabata e Arubiano, pa kende Status Aparte no tabata un asunto estatal y politico pero un anhelo bibo cu otro miembronan di Redaccion cu mi a topa, a confirma.
E trabou di Hefe di Redaccion cu Jossy Mansur a ofrece mi persona, no tabata basa riba un robot tecnico pero riba un persona, cu como hende por a sirbi e causa di Aruba cu ta sagrado pa e Arubiano na un forma ehemplar pa mundo.
E idealismo di Jossy Mansur, e idealismo di Aruba, a vence. Mi a despedi di e corant di Curaçao pa dirigi e corant di Aruba entrante Januari 1983.
500 Palabra pa describi Jossy Mansur ta 500 palabra pa describi e alma Arubano di lucha, perseveransa, insistencia, logro, cu a conduci na un Aruba autonomo den Reino.
Pa medio di Jossy Mansur mi a cera conoci cu Aruba, cu merece respet pero tambe e sentimentonan humano mas profundo.
Jossy Mansur a introduci mi na un famia DIARIO, cu mester a sirbi e famia Aruba, basa riba e normanan y balornan Arubano.
Awe den e reconstruccion di un mundo nobo, Jossy Mansur ta entrega periodismo e reto y deber di defensa di Arubianismo.
500 palabra pa describi Jossy Mehsen Mansur. 500 palabra pa recorda e lider di periodismo na Aruba.
