ORANJESTAD(AAN): Bureau City Inspector (BCI) a tene un rueda di prensa Diahuebs mainta relaciona cu e reclamonan cu tin rond di e mal holor na dam di Moko.
For di dia 6 di October cu e melding a drenta, BCI ta trahando riba esaki.
Durante e conferencia di prensa Hoofd van Dienst Kevin Peterson a splica cu segun e melding, henter e bario tin problema grandi cu e holor stinki cu ta sali for di e dam.
“Mesun dia tres City Inspector a bay na e sitio y en berdad nan a constata cu e holor ta bastante desagradable”.
Di biaha mi a cuminza acerca e departamentonan concerni pa wak kico por ta locual ta causando e holor aki, segun Peterson.
El a sigui bisa cu mirando cu BCI no tin un laboratorio pa haci e tipo di testnan aki, el a tuma contacto cu DVG cu si tin laboratorio pa haci test y por determina kico ta causa e holor y kico por haci, por ehempel tira un quimico den e dam pa kita e holor.
Segun e Hoofd van Dienst algun tempo atras turistanan a keha di holornan fuerte den area di hotel y D.O.W a traha hunto cu DVG, unda cu a haci uso di un quimico y awor e holor no tey mas.
“Mi ta kere cu nan lo por haci algo mescos den e asunto aki tambe, pero tur cos ta den man di D.O.W, DVG y DNM”.
Mirando cu den diferente medio e kehonan a wordo reporta, mi a dicidi di yama e rueda di prensa aki pa mustra cu nos ta haciendo nos best pa soluciona e problema aki, segun Peterson.
El a indica cu te hasta habitantenan cu ta biba 500 pa 600 meter leu di e dam, ta sufri di e holor fuerte aki.
“Ayera nos a haya un yamada tambe cu ta mustra riba e hecho cu un persona di 68 aña bibando den e area a cuminza sinti su mes malo debi na e holor, pues algo mester wordo haci”, segun Peterson.
Prensa a puntra e Hoofd van Dienst si e dam ta riba tereno priva of si ta di Gobierno y el a splica cu e ta un asina yama ‘afgraving’(coba) di hopi aña bieu, unda cu nan a yega te nivel di laman.
Pues e awa cu ta drenta e dam ta awa salo cu no por wordo uza pa mata.
Prensa a indica na Peterson cu tin trucknan di chica pos cu tur dia ta deposita e sushedad den e dam y a puntra si algo por wordo haci.
Segun Peterson e ta tereno priva, pues e doño lo mester ta responsabel pa esaki.
El a indica cu polis for di basta tempo caba a wordo poni na altura di e situacion y ora cu puntra hende por ehempel si nan a wak number di e truck cu a tira sushedad na e dam, nunca hende por duna un number.
“Esey ta stroba e trabao di haya sa ta ken ta dump e awa eynan”, segun Peterson.
