Minister Arends a presenta Deltaplan detayando un strategia cu enfoke nobo riba cuido di adulto mayor y embehecimento

ORANJESTAD (AAN):  Durante e exitoso Foro Nacional pa Adulto Mayor, Minister di Asuntonan di Adulto Mayor, Sr Ursell Arends a presenta su Deltaplan 2023-2033,

detayando un strategia comprensivo pa un enfoke nobo riba cuido di adulto mayor y embehecimento.

                Reconociendo e vulnerabilidad di adultonan mayor den comunidad, e Deltaplan ta fungi como un masterplan pa guia esfuersonan colectivo pa mehora e calidad di bida pa e adulto mayor den e proximo decada. E plan ta enfoca riba transformacion di sistema di cuido y embehecimento medicalisa pa uno cu enfoke social. 

Perspectiva Social: Realisando cambio den manera con ta mira adulto mayor

                E Deltaplan pa 2033 tin como meta pa introduci un cambio di perspectiva di e adulto mayor den comunidad, dunando espacio pa un manera mas social pa anda cu embehecimento. Asina por reconoce nan nesesidad humano, nan deseonan di autonomia, relacion social y nan derecho pa wordo tuma na serio. 

No un of e otro, sino basa riba necesidad

                Aunke ta importante pa brinda bon cuido medico unda ta necesario, e ta igualmente importante pa no medicalisa nan necesidadnan social. Embehecimento no ta un cuestion di si bo tey enfoca riba e parti medico so sino un cuestion di e parti medico hunto cu e parti social. 

Ayudo na tempo

                Pa yuda e adulto na un manera adecua ta necesario pa cuminsa na e momento adecua den nan bida diario, preferiblemente prome cu tin un "crisis". Prevencion social ta haci nan bida mas agradabel y por wordo aplica den nan propio cas. Un cadena di cuido social lo yuda logra esaki.

                E Deltaplan 2023 - 2033 ta establece metanan ambicioso, incluyendo aportacion na barionan cu ta tene cuenta ku necesidadnan di adulto mayor, reforsamento di rednan social di adulto mayor, transporte adecua, evita nan pasa hamber, y trata adulto mayor ku dignidad. E plan ta enfoca tambe riba educacion pa personanan ku ta duna servicio di cuido, atencion na esnan cu tin demensia, y reforsamento di conexion entre generacionnan.

"Nos ta uni forsa pa atende no solamente e necesidadnan medico, pero tambe pa preserva e aspectonan social y humano di bida di nos adulto mayor. Esaki ta un compromiso pa un Aruba caminda tur persona di edad avansa por biba un bida digno, cu cariño y respet", Minister Arends ta termina.

                Gobierno di Aruba ta invita organisacionnan priva y publico pa colabora den d realisacion di e Deltaplan, enfatisando e responsabilidad comparti di henter comunidad pa nos adultonan mayor.