Ivo Valdez di OPPA:
ORANJESTAD (AAN): Den entrevista cu Ivo Valdez, di Organisacion OPPA, el a bisa cu despues cu asina tanto biaha a trece pa dilanti cu mester cuminsa cu e asunto di embehecimento y e forma con esaki ta tumando lugar na Aruba, e ta contento cu por fin tin un minister cu tambe ta mira e necesidad pa haci algo na e asunto aki.
Valdez a sigui bisa cu OPPA ta mencionando tur locual mester cambia y ta spera cu berdaderamente hunto por percura pa un cambio pa e adulto mayor tin un bida mas trankil, digno, cu respet y cu cuido.
"Nos tur kier bira grandi, nos tur ta bira bieu, pero e forma cu nos ta bira bieu ta hopi importante. Pesey mi ta contento cu e foro aki a tuma luga. Por lo menos, e ta habri mente di nos ciudadanonan y tambe di e famia pasobra ta hopi importante pa trata e adulto mayor cu dignidad, respet y dun'e su balor cu e merece", a expresa.
Ivo Valdez a laga sa cu regularmente nan a sinta cu Minister Arends y cada bes OPPA ta trece nan puntonan. Pero e unico problema cu OPPA tin y cu gobierno di Aruba tin ta e falta di financiamento pa tur e puntonan cu nan ta trece dilanti.
Tur cambio ta encera placa y placa ta loke menos Aruba tin. Pero e ta spera cu mester bin un fondo specialmente pa nos grandinan pasobra esaki ta hopi necesario, e remarca.
