ORANJESTAD (AAN)/Den Haag: Minister Plenipotenciario mr. Ady Thijsen recientemente a bishita embahador di Sur Africa na Hulanda Yusi Madonsela.
Minister Thijsen a introduce su mes na embahador Madonsela y tambe a papia riba su vision y maneho pa loke ta trata e contactonan cu embahadanan. Esaki pa mira riba cual tereno tin posibilidad pa cooperacion cu Aruba. Tambe Minister Thijsen a elabora riba e situacion actual, unda Aruba a recupera hopi liher di e pandemia pa loke ta turismo. Tambe e mandatario a trata e tema di energia sostenibel y e transicion cu Aruba kier tuma cu un planta di hidrogeno. Embahador Madonsela a bisa cu Sur Africa tambe ta moviendo riba e tereno aki y ta den discusion pa exporta hydrogeno via e waf di Rotterdam.
Embahador Madonsela - cu ta bin for di e sector huridico - tabata miembro di Corte Supremo di Sur Africa y tambe a ocupa diferente posicion den e ministerio di Husticia. Segun embahador Madonsela, economia di Sur Africa a conoce un diversidad enorme, pa loke ta turismo, agricultura y industria di mina. Pa loke ta trata Aruba, embahador Madonsela a bisa di ta interesa pa sondea e posibilidad pa crea un hub pa biña Sur Africano den Caribe. Y Aruba por ta un localidad ideal pa un hub asina.
Tambe embahador Madonsela tabata hopi interesa den aspectonan turistico di Aruba cu por ta interesante pa e turista Sur Africano. Dos elemento a bin dilanti durante e combersacion, cu ta uno e posibilidad pa artistanan Sur Africano por ta parti di e programa di Soul Beach Festival. Esaki mirando cu tin desaroyonan positivo pa loke ta musica Sur Africano. Tambe cu Sur Africa - cu pa tercer parti ta rondona cu laman - tin hopi Sur Africano cu ta practica e deporte di windsurfing y cu HI Winds na Aruba tambe por ta interesante pa nan participa na e evento internacional aki. Cu participacion di Sur Africano na e dos eventonan aki por stimula turista Sur Africano pa bishita Aruba, segun embahador Madonsela.
Minister Thijsen a bisa cu sigur e lo trece e puntonan aki bou atencion di ATA pa mira cual posibilidad esakinan ta brinda. Tambe el a gradici embahador Madonsela pa e recepcion ameno y a bisa di spera cu esaki por ta e prome pasa pa yega na formanan di cooperacion entre Sur Africa y Aruba.
E potret ta cortesia di Arubahuis
