Minister Arends a bishita cunukero legendario Coby Croeze

ORANJESTAD (AAN): Despues di a bishita Santa Rosa durante e siman cu a pasa, minister Arends a wordo invita pa pasa diasabra mainta trempan cerca nada menos cu sr. Coby Croeze,

un cunukero legendario di 90 aña di edad, cu te dia di awe ainda ta planta.

            Awendia sr. Croeze ta planta primordialmente pinda. Minister Arends y su señora esposa a pasa un momento ameno, bow tent na sr. Coby su cas, den compania di miembronan di su famia cu a bin hunto na e ocasion aki pa yuda ranca pinda.

            Sr. Coby a splica con su tata a pasa su conocimento di planta pa su persona y con sr. Coby a pasa esaki pa su yiunan y su nietonan.

            Durante e bishita aki minister Arends por a mira di cerca con e proceso ta bay y a haya sa kico Gobierno hunto cu Santa Rosa por haci pa asina yuda cunukeronan na Aruba. Sigur un mainta hopi agradabel unda minister Arends a keda impresiona di e union familiar y e pasion pa planta y cosecha.

            “Mi ta contento cu Santa Rosa a haci e bishita aki cerca sr. Coby Croeze posibel,” Minister Arends a cuminsa ta bisa. “Aki por mira con un Arubiano ta usa un espacio relativamente chikito y saca lo maximo di dje door di planta entre otro pinda. Mi a siña hopi y mi a haya un bista di kico ta esfuersonan cu cunukero ta haci aki na Aruba. Mi ta agradecido pa e hospitalidad di sr. Coby y henter su famia.

            E generacion di awe y esun di futuro por siña hopi di sr. Coby y su famia. Den transcurso di e siman nan mi dilanti mi lo ta bishitando mas cunukero pa asina siña mas di kico tur nos propio hende ta planta y con nos, como Gobierno, por asisti nos cunukeronan.” Minister Arends a termina ta bisa.

            Minister Arends a duna un gradicimento grandi na Santa Rosa pa e iniciativa aki y ta ripiti su compromiso pa traha di cerca cu nan pa asina hunto por yuda nos cunukero nan. Pasobra na final di dia, Aruba mester di nos tur.