Entrante 15 di November ta e fecha cu: *Dhr. Jayburt Dijkhoff a informa
ORANJESTAD (AAN) – Dhr. Jayburt Dijkhoff, ken actualmente ta Hoofd di 'Afdeling Kwaliteits Instituut Gezondheidszorg', cu ta resorta na Departamento di Salubridad Publico (DVG), a duna un contexto di kico ta bay ta e cambio pa Aruba, encuanto AruBIG y kico esaki ta nifica pa e personanan cu, na September ultimo, a inscribi pa prome biaha den e Registro di AruBIG.
El a duna un impresion di con e website dvg.aw unda por haya e AruBIG, ta mustra e informacion general y cual ta e rekisitonan pa yena e peticion, pa asina yega na remarca pa e registracion.
Dijkhoff a indica cu tur profesional por subi eyriba pa yena e formulario di registracion, y asina entrega nan peticion pa asina yega na remarca pa e registracion den AruBIG.
Dhr. Dijkhoff a duna di conoce cu dia 15 di November proximo, ta e fecha cu tur persona cu ta traha na Aruba como docter, boticario, partera, fisioterapista, y dentista mester registra den AruBIG pa sigui eherce nan funcion y tambe pa haya hendenan cu ta traha hunto cu nan.
Dijkhoff a menciona cu entrante aña 2022 lo traha riba e otro tres profesionnan cu falta, cu ta e enfermero, psicologo, y psicoterapeutanan.
Nan lo sigui despues di un Landsbesluit, papiando cu tur e stakeholders kico ta bay ta e rekisitonan y e diplomanan reconoci.
Dijkhoff a sigui splica cu pa cuminza esun cu ta reconoci, naturalmente ta e BIG Register di Hulanda, cual ta duna automaticamente reconocemento pa por bin traha na Aruba.
Fuera di esey tin e organonan di acreditacion, y e prome cu a wordo reconoci ta esun di Canada (Medical Council of Canada) pa tur medico cu kier bin traha na Aruba, y tambe e National Dental Examining Board di Merca, cu ta specificamente pa e dentistanan cu ta bin traha na Aruba.
El a agrega cu tambe tin na Merca e Icfmg Certification, cu un bez cu pasa e board exam rekeri, e persona ta bin na remarca pa por registra. Y pa e dentistanan tin e Joint Commission cu tambe ta duna e derecho pa bin registra na Aruba.
Fuera di esaki, dhr. Dijkhoff a agrega, tin na Costa Rica, hunto cu e Organo di Acreditacion Sinaes, tin tres universidad reconoci cu ta Universidad Latina, UCIMED, y Universidad de Costa Rica, cu ta duna cu ta duna tambe e derecho di bin registra na AruBIG. Na Colombia, tin e Organo di Acreditacion CNA hunto cu dos universidad: Universidad del Bosque y Universidad Haveriana, cu tambe ta haci posible cu un persona por registra na AruBIG.
Fuera di esey na Aruba tambe tin tres posibilidad conforme ley: tur opleiding cu ta reconoci pa Directie Onderwijs, tur specialismo reconoci pa Decreto Nacional “Arts en Arbeid en Gezondheid Aruba” (Nspoh) conhuntamente cu SVb, y tambe den futuro e Instituto di Calidad por organiza su propio examennan, y esey ta un posibilidad cu ta keda pa e futuro candidatonan registra den AruBIG.
