ORANJESTAD (AAN): Tabata Diabierna mainta banda di 6:55 am, cu yamada urgente a drenta na Polis, pa indica cu e momento ey tin un muher ta gritando pa auxilio na Eagle Beach.
Inmediatamente a cuminza manda un unidad di Polis di Noord pa e area pa check kico ta pasando. Despues a haya informacion cu e caso aki ta na e beach net pabao di Amsterdam Manor, y di berdad e muher ta gritando pa “help”.
Ora cu e unidad di Polis a yega na e beach, nan a mira un dama cu tin varios herida y corta na su pianan y tambe man, y nan tabata sangra profusamente.
E dama di inicial L., a splica cu e tabata den lama y un bestia preto grandi a atake den awa.
Polisnan a mira e herida, y ta sospecha cu un congla (pisca estilo colebra) lo a haci esaki. Un congla en general no ta haci esaki, pero nan por morde y herida un persona, si acaso e animal ta sinti su mes menaza of si un hende a invadi nan ‘espacio’ den lama.
E dama a bisa cu e bestia a keda morde diferente biaha.
Ambulans a presenta na e lugar, y a cuminza duna yudanza, y mesora a bay cune rumbo pa Servicio di Emergencia na Hospital pa tratamento avanza y pa stop e sangramento.
Polis na final a notifica Central di loke a socede aki.
