Militarnan di Aruba y Corsou ta train hunto durante ehercicio ‘Caribbean Strike’

ORANJESTAD (AAN): Durante e proximo dos simannan, mas cu 90 soldat Caribense lo train hunto na Corsou durante e ehercicio Caribbean Strike.

E ehercicio lo tuma luga den e area rond di Wacao, Ascension y Playa Santa Cruz.

            Diamars dia 10 di juni e militarnan di Aruba a subi e barco di sosten Zr.Ms. Pelikaan, cu a trece nan for di Aruba pa Corsou. Eynan, hunto cu soldatnan di Corsou, nan lo entrena varios habilidad militar, entre otro infiltracion tactico di un area, patruya di reconocemento, realisá atake y emboscada, varios ehercicio di tiro y actua den areanan urbano. E ehercicionan lo wordo realisa na varios localidad, entre otro e area di entrenamento militar na Wacawa, den e area rond di Ascencion y rond di Playa Santa Cruz. E unidadnan lo move entre e diferente areanan di entrenamento den vehiculonan militar. 

Profesionalisacion

            Caribbean Strike ta parti di e desaroyo profesional di e militarnan Caribense. Pa medio di entrenamento intensivo den scenarionan realistico e preparacion pa para cla,  y e posibilidad pa keda desplega, ta ser haci tanto den e unidadnan Arubiano como esnan Curasoleño. Ehercicionan manera esakinan ta esencial pa prepara e militarnan optimalmente pa nan tareanan den paisnan, incluyendo dunamento di asistencia den caso di crisis of calamidadnan.