Parlamentario Muzaninn Wever:
ORANJESTAD (AAN) – Parlamentario di fraccion FUTURO, Muzaninn Wever, a sigui splica den entrevista cu DIARIO, cu otro reto cu e desaroyo di sector primario na Aruba tin, ta e facilidad, por ehemplo di huurgrond, na unda tin cierto restriccionnan pa esaki.
Otro reto ta e asunto di belasting, cu tambe a wordo toca durante e reunion di comerciantenan di sector primario cu Parlamento.
Parlamentario Wever a expresa cu e minister ta habri pa wak kico ta e espacio cu lo por tin pa haci cambio den esaki, pasobra con cu bay bin, bo ta creando cierto movecion pa tin pilar nobo, y no sa con grandi e por bay bira.
“Nos sa cu nos capacidad maximo di locual cu Aruba por produci, lo por sostene full un poblacion incluyendo turista cu ta bay bin Aruba. Pero alomenos bo por minimaliza e necesidad di importacion”, Wever a señala.
El a agrega cu otro retonan cu lo por bay haya, apart di e belasting, ta e hendenan cu ta bay tin mester y tambe mester urgi e studiantenan cu ta bay studia afo, pa considera innovacionnan den agricultura. “Pasobra tin hende cu tin ideanan un tiki eroneo kico ta traha den agricultura, cu bo ta bezig ta chapi, etc., pero nos studiantenan, vooral ora nan ta bay haci HBO nan pensamento ta un tiki mas limita, y mi ta kere ta pasobra nan no a wordo den un ambiente kico realmente esaki ta”, e Parlamentario a señala.
El a menciona por ehemplo, introduci nos muchanan chikito cu agricultura den scol primario, crea un hardin y move esaki pa scol secundario, pa fomenta nan interes pa produci nan mesun cuminda. “Den mi concepto, agricultura y seguridad alimenticio ta algo cu nos mester bay tin hopi conocemento riba e tereno aki. Pues, studiantenan cu ta bayendo studia afo, considera un programa riba e tema aki”, Parlamentario Muzaninn Wever, di fraccion FUTURO, a remarca.
