Gobierno a honra comunidad Portugues riba Dia di Camões

ORANJESTAD (AAN): Riba Diamars, Gobierno di Aruba, representa pa Prome Minister, mr. Mike Eman,

a asisti na e celebracion anual di Dia di Camões, celebra na Wilhelmina Park. E celebracion, cu ta honra e herencia cultural, patriotismo y balornan nacional di Portugal, a trece lidernan politico, Presidente di Parlamento, Cuerpo Consular, Consul Honorario di Portugal, y miembronan distingui di e comunidad Portuges na Aruba, hunto.

Durante e celebracion, Prome Minister a expresa su profundo respet y admiracion pa e comunidad Portugues na Aruba, cu mas di 60 aña pasa a imigra y forma un bida nobo riba nos isla.

For di e isla di Madeira, gran parti di e migrantenan Portugues a traha un futuro na Aruba a base di trabao duro, fe y amor, un herencia cu ta biba te awe den e generacionnan nobo. Gobierno di Aruba ta reconoce cu e comunidad Portugues a haci un contribucion fundamental den cada aspecto di desaroyo di nos isla.

For di posicionan di liderato den gobierno, justicia, educacion y cultura, te infrastructura y economia, talento Portugues a yuda desaroya e Aruba di awe.