Militarnan a haci training aterizando pista di dragrace di Palo Marga y tambe Koraal Tabak

ORANJESTAD (AAN): Den simannan cu a pasa, Defensa Hulandes pa Caribe a haci varios training militar riba e islanan di Aruba y Curacao.

   Y e ex-pista di careda di dragrace na Koraal Tabak na Curacao, a wordo usa como un centro di entrenamento.  Den e area a haci ehercicio di evacuacion medico.  Y aki a haci uso di e pista di careda pa asina ateriza cu avion priva pa den e ehercicio, por yuda cu evacuacion medico.

   E mesun tipo di ehercicio a wordo haci tambe na e pista di careda di Palo Marga na Aruba.

   Segun Defensa Hulandes, e training aki na Aruba y Curacao ta encera e importancia di evacuacion medico.  Den caso cu tin un situacion di emergencia medico, kizas tin di ateriza cu avion na lugarnan unda cu normalmente esey no ta socede.

   Den casonan di heridanan serio of hasta situacion di bida of morto, cada minuut ta conta.  E herido por wordo hiba na un lugar unda mihor cuido ta urgentemente necesario.

  Tambe a train e proceso di ‘drop’ material medico for di un avion.  Esaki por wordo usa ora cu por duna asistencia medico mas specifico na un herido, ora cu un avion no por ateriza.

   DIARIO a tuma nota cu nan a haci uso di un Cessna 172M cu ta un avion cu ta pisa menos di 5.700 kilo.  Y den pasado por lo menos 1 biaha un avion a yega di ateriza na pista di Palo Marga.  Un biaha esey a socede ora cu un avion priva jet cu a ateriza eynan.

   E potretnan aki ta di e training na Koraal Tabak na Curacao.