Minister Dangui Oduber a reuni cu gerencia di Aruba Tourism Authority pa comparti su maneho y vision

ORANJESTAD (AAN): Minister di Turismo Dangui Oduber a caba di huramenta Dialuna atardi y a cuminsa mesora cu trabaonan pa sigui recuperacion di nos turismo.

   Di e forma aki a reuni cu CEO di ATA señora Croes y tambe miembro di management señora Vis riba e maneho y vision pa e siguiente 4 añanan di turismo.

   Tabata hopi importante pa riba e promer dia di trabao comparti esaki cu ATA pa por percura pa e maneho aki worde ehecuta pa ATA pa e siguente periodo di gobernacion. Durante e encuentro aki, e minister a comparti cu ATA unda e kier mira turismo.

   Minister Oduber a informa cu e lo kier percura pa sigui atrae turistanan afluente, turistanan cu tin un entrada annual di minimo $150.000. E enfoke lo ta dirigi riba e asina yama “high value” customer. Esun cu tin e capacidad pa gasta den nos economia. E vision di crecimento ta dirigi riba low volume high impact.

   Minister Oduber a splica cu kier sigui mira desaroyonan pero desaroyonan chikito, brand names y cu tin menos impacto riba nos naturaleza y capacidad di carga. Aruba ta den un posicion awor aki di luho den sentido, ta keda na nos cual desaroyo nos kier, cua brand nos kier y cuanto camber.

   Pa mantene Aruba competitivo lo tin diferente proyecto pa mehoramento di producto Aruba.

   A elabora tambe den ki formanan por maximalisa e entrada cu ta worde genera pa turistanan pa pais Aruba.

   E reunion aki tabata uno fructifero y minister Oduber ta cla pa sigui riba recuperacion di nos turismo. Turismo ta nos unico pilar economico y ta keda e driver principal di nos economia.