Mildred Schwengle a entrega su retiro di funcion como representante di Raad van State pa Aruba

ORANJESTAD (AAN): Entrante 1 di november 2023, señora Mildred Schwengle, a base di su propio peticion,

ta retira di su trabao como representante di Raad van State (RvS) pa pais Aruba. Señora  Schwengle pa seis aña a exactamente a fungi como miembro di departamento di RvS di Reino. Prome cu señora Schwengle a asumi e responsabilidad aki, dr. Mito Croes tabata ocupa e funcion di representante di RvS pa Aruba te cu juni 2016.

   Procedimento: Ken lo asumi e funcion despues di señora Mildred Schwengle ainda no ta conoci. Minister di Asuntonan Interno y Relacionnan di Reino di Hulanda lo consulta esaki cu Prome Minister di Aruba Evelyn Wever - Croes y cu e vice presidente di RvS. Conseho di Ministro di Reino lo tuma e decision pa presenta e candidato na Rey Willem-Alexander, pa e nombracion como representante di RvS.

   Departamento di Conseho di Reino di RvS di Reino Hulandes ta reuni un biaha pa luna, riba diaranson, y ta duna conseho den liñanan grandi tocante e mesun temanan cu e departamento di conseho di RvS. Cerca RvS di Reino e ta bay tocante topiconan no solamente di interes pa Hulanda, pero pa henter Reino entre otro: Leynan di Reino y tratadonan di Reino.

   E departamento di conseho di RvS di Reino ta consisti di miembronan di e departamento di conseho, plus tres otro miembro di e otro paisnan den Reino.

   Curriculum vitae di Mildred Schwengle: Mildred (Milly) Schwengle a studia ley na e anterior Katholieke Universiteit Nijmegen. Entre añanan 1990 y 1994 e tabata fungi como “plaatsvervangende officier van justitie” y despues como griffier na Corte di Prome Instancia. Na 1994 el a bira abogado y el a traha como abogado na Aruba y Curaçao y tabata partner na e bufete HBN law, te cu su nombracion como miembro representante di Aruba den RvS.

  Gobierno di Aruba ta gradici señora Schwengle pa su tremendo trabao durante e añanan.