Hospice Atardi a lansa programa informativo:  'Cera conoci cu Hospice Atardi'

ORANJESTAD (AAN):   Diabierna 5 di mei a tuma lugar e première di e programa informativo tocante cuido den hospice Atardi: 'Cera conoci cu Hospice Atardi', produci door di Norman Thijsen.

Miembronan di Team Hospice y algun invitado  por a mira e programa aki pa prome biaha den sala di Unoca na Cas di Cultura.

            Benita Britt-Croes, president di Fundacion y Matsy van Oers, directora di Hospice, a introduci e programa y participantenan a wordo gradici.

            Un danki special a bay na Fred Wapenaar (den feliz memoria) cu tabata un huesped cerca nos, su donacion a haci posibel pa Fundacion Hospice Atardi por a laga produci e programa aki.

            A tuma un minuut di silencio na honor di tur huesped cu a keda  na nos hospice durante ultimo añanan.

 Meta di e programa aki ta pa duna pueblo di Aruba mas conocemento tocante cuido paliativo en general y mas specifico e cuido cu hospice ta ofrece. E programa ta duna un bon imagen di e prome hospice cu tin na Aruba, esaki pa medio di entrevistanan cu nursenan, boluntarionan y famianan di difuntonan cu tabata huesped na Hospice Atardi.

            Tambe algun dokter di cas, specialista, un trahado social di Hospital, un notario y un psicologo a participa na e programa aki.

            Despues di presentacion di e programa (cu ta consisti di 3 parti), tabata tin un get-together den foyer di Cas di Cultura.

            Tin cu menciona cu e aña aki, na november, Hospice Atardi lo celebra su di 5 aña di existencia!

Pocopoco Hospice ta haya e confiansa di pueblo di Aruba, aunke pa hopi hende e concepto ainda ta desconoci.

            Hospice Atardi ta un cas caminda ta ofrece ayudo y sosten na hende cu ta den fase final di nan bida, ora cu ya no tin cura mas.

            Un team di boluntario, enfermero y dokter di cas ta duna e cuido aki na e persona y su famia.

Nos kier crea un lugar cu un ambiente sigur pa nos huespednan.

Alivia sufrimento, crea espacio pa cada un, respeta autonomia y duna atencion na nos huespednan ta loke nos ta pone na prome lugar.

            Pa nos, henter Team Hospice Atardi, ta hopi importante pa nos no scucha mas: ‘Dicon mi no a tende di boso mas prome’? of ‘Nunca mi a tende di boso’.

            Ora bo ta den fase final di bo bida, ta bon pa sa cu tin mas opcion pa organisa cuido pa bo.

Hospice Atardi ta un cas casi manera nos mes cas’ cu 24/7 ayudo presente pa asina e carga bira menos pisa pa cada un.

             Bestuur y Directiva di Fundacion Hospice Atardi kier gradici tur hende cu tabata envolvi den e programa 'Cera conoci cu Hospice Atardi'. Door di nan participacion el a bira un programa bunita y caluroso.

Keda pendiente!

E programa 'Cera conoci cu Hospice Atardi' lo wordo lansa pronto riba social media y television.