Michael Lampe nombra como Cultural Ambassador pa Aruba

Prome Minister Eman

ORANJESTAD (AAN): Prome Minister mr. Mike Eman, hunto cu Arthur Loefstok y Edjean Semeleer di Fundacion GoCultura y artista cultural Michael Lampe, a haci un anuncio importante pa futuro di cultura Arubano.

Durante e ultimo fin di simannan, riba diasabra, a tene varios encuentro cu personahenan cu hopi conocemento di cultura y ideanan pa engrandece e sector cultural. E reunionnan aki a sirbi como base pa formula un modelo nobo di maneho cultural, pa por bay den un consulta grandi cu tur stakeholders na Aruba. E obhetivo ta desaroya un strategia cu ta enfoca riba renobacion, renacemento y acento riba nos balornan cultural.

Fundacion GoCultura ta trahando activamente riba ideanan pa mehora, stimula y sostene e industria creativo. Den su vision pa futuro, Gobierno lo incorpora e ideanan cu sali for di e grupo di experto cu a participa den e reunionnan, den e maneho cultural nobo.

Como un paso clave den e desaroyo aki, a nombra Michael Lampe como Cultural Ambassador pa Aruba. Lampe ta un experto reconoci den cultura Arubano, cu recientemente a completa un estudio ehecutivo di Cultural Diplomacy, y a gradua cum laude. Su nombramento ta representa un paso strategico pa eleva Aruba su perfil cultural na nivel nacional y internacional, y pa fortifica e laso entre creatividad, identidad y diplomacia.

Michael Lampe tin un trayectoria amplio den e mundo cultural y a representa Aruba den eventonan internacional manera Amsterdam Dance Event (ADE), caminda bao di su proyecto “Flying Park”, e a dirigi un masterclass riba expresion creativo, raiznan cultural y innovacion. Lampe a mustra con nos patrimonio cultural por briya riba plataforma mundial.

Como ex-miembro di Parlamento y figura publico, Lampe ta fortifica e papel di cultura den formacion di union social y dialogo entre comunidadnan. E tambe ta un figura central den e programa Music Hubs na Aruba, un iniciativa financia pa Fondo Hulandes pa Arte di Presentacion. Aki e ta guia y mentor productor- y musicantenan hoben Arubano den produccion, branding y promocion pa yega nivel internacional.

Diplomacia cultural ta e uzo strategico di elementonan cultural manera arte, musica, idioma y tradicion pa construi relacionnan, stimula comprension y promove interesnan nacional den un contexto global. E nombramento di Michael Lampe como Cultural Ambassador ta reforsa Aruba su compromiso pa pone cultura na e centro di nos desaroyo y posiciona nos pais como un hub creativo riba e mapa mundial.