Parlamentario Rocco Tjon
- Nan uzo awor ta ser implementa na Aruba como proyecto piloto
ORANJESTAD (AAN): Den un entrevista cu DIARIO, Parlamentario Rocco Tjon a indica cu Gabinete Wever-Croes II a bin cu e proyecto di Bodycams, pa motibo di seguridad, pero mas tanto pa seguridad di e agentenan polis mes.
Ta importante pa enfatiza cu na prome instante, pa introduci esaki atraves di un proyecto piloto, despues di a hiba diferente combersacionnan cu tanto cu sindicato di polis, anto consecuentemente e intencion tabata pa e proyecto piloto aki, mustra nan kico tabata e balor agrega di e Bodycams, y asina tuma un decision si ta implementa esaki of no.
Segun Tjon, na unda e proyecto ta aworaki e ta corda cu na februari, nan tabata den Parlamento, e cu dos 'pechi' bisti, uno como Minister y otro como Parlamentario, y na maart pa un reunion publico, na unda a duna un presentacion detaya riba e proyecto. Tin 32 Bodycam cumpra, e mes como Minister a acorda y cumpra, pa asina percura pa tuma mas tempo cu e proyecto piloto ta debi na dos aspecto pa loke ta trata e parti di legislacion.
Tjon a bisa cu ta importante pa splica cu no ta simplemente cu e polis ta bisti e Bodycam y ta cuminsa haci uzo di dje. Tin diferente rekisitonan cu Cuerpo Policial mester cumpli cu ne, por ehempel, e imagennan, ki ora por uza nan y ki ora no, con ta warda e imagennan aki, y hopi importante tambe con ta distribui e imagennan aki, y despues con ta deshaci di e imagennan. Pasobra nan no por keda cu e imagennan aki pa semper. El a splica cu e aspectonan aki ainda tabata den preparacion, y e proyecto lo inicia pa juli.
Pa loke ta trata legislacion, den su concepto e ley ta completamente na ordo, pa por haci uzo, di camara. Tur hende cu ta core rond di Aruba, ta wak e borchinan pega cu ta indica cu hende ta den area caminda tin vigilancia di camara. Den caso di Bodycams, el a scucha Minister di Husticia, señor Dowers, duna un declaracion riba esaki, cu den su concepto e ley ta acapara esaki, cual e ta di acuerdo y cu si Cuerpo Policial por cuminsa haci uso di e Bodycams.
E parlamentario a indica cu como proyecto piloto, a cumpra 32 Bodycam, pa wak su balor agrega, como tambe nan lo cuminsa uza e Bodycam den cierto districto y obviamente lo por uza nan den otro districto y asina tur districto por duna nan feedback. Cu e feedback aki, nan lo mester a sinta y wak si ta cumpra mas Bodycam pa full Cuerpo Policial.
Tjon a agrega cu e proyecto di camara di seguridad riba areanan specifico, tur cos cu a wordo aproba ta consisti den diferente fasenan. Manera ta conoci, e parti di areanan di hotel ya caba tabata full ehecuta, tabatin 40 punto strategico rond di Aruba. Esaki tabata e proyecto cu a bay via Elmar y SETAR, cu a haci area di hotel, y 'as we speak' ta bezig cu Oranjestad, cu ta un proyecto cu nan a bay laga atras aproba caba.
