Mexico ta usa Sargassum y transform’e den bloki pa construi cas

CANCUN: Partinan grandi di costa di Mexico ta wordo afecta na forma terorizante pa miles di ton di yerba di lama conoci como ‘Sargassum’. 

Esakinan ta infiltrando riba beachnan di e.o. Cancun, causando molester enorme pa e industria turistico pa Mexico.

   Tur dia, centenares di trahador cu halado y usando equipo pisa, tin di haci beachnan limpi, y monton di dumptruck yena cu Sargassum ta bay pa deposita nan den mondinan aleha pa evita cu e holor desagradable por stroba habitantenan.

   Pero un empresario, Omar Vasquez a bay check e consistencia di e yerba di lama aki, y el a bin haya e idea cu Sargassum ta un oportunidad unico pa e crece su negoshi di landscaping.  Esaki a cuminza desde 2015 caba ora cu e beachnan di e estado di Quintana Roo unda Cancun ta situa.

   E prome añanan el a bende sargassum como fertilizante y tabata bende esaki den cantidadnan chikito.  Despues el a dicidi na cuminza experimenta pa haya e forma corecto pa fabrica blokinan di sargassum, y ora el a descubri e formula corecto, el a busca y a ricibi un patent pa e prome Bloki di Sargassum.

   El a usa Sargassum como materia prima principal, y di eynan bo por haci tur cos.  Pesey desde 2018 e tin e patent pa e prome Bloki di Sargassum pa wordo usa den construccion.  El a ricibi peticion pa bay construi casnan di Sargassum na paisnan manera Belize, Jamaica, Puerto Rico, Republica Dominicana, Barbados, Malaysia y Merca tambe, unda nan ta wordo hopi afecta pa manchanan grandi di Sargassum.

   E prome cas cu el a construi full for di Sargassum ta yama ‘Casa Angelita’, y ta na honor di mama di Omar Vazquez, traha cu material prima di forma artesanal.  Casa Angelita ta consisti di 20 ton di Sargassum muha, cu ora bo extrai esaki di beach e ta pisa mas.  Nan ta 20 ton equivalente cu 2.150 bloki di sargassum.

   Pues ya caba por lo menos 1 persona a logra converti Sargassum den bloki util pa construccion.  Ban mira kico mas cientificonan por bin cune pronto.