Interesante, bunita, y cu bon acogida e campaña “Un soño pa Aruba”. Un Aruba sin abuso di mucha!

Miguel Aceros y Marceylaine Paskel, ta dos studiante di Universidad di Aruba, di e Facultad di Trabao Social y Desaroyo, ta core stage na Fundacion Respeta Mi.

Den un entrevista Miguel y Marceylaine, ta relata kico ta nan meta como Stageaire na Fundacion Respeta Mi, y con nan a bin na e evento “Un soño pa Aruba”, unda a pidi pueblo en general y tur instancia publico y priva pa bisti na blou, y apoya nan campaña y Fundacion Respeta Mi.

Miguel a menciona cu Luna di April ta e luna di concientizacion contra abuso di mucha, y tur aña Fundacion Respeta Mi tin un plan den luna di April. E aña aki Miguel hunto cu su colega Marceylaine a dicidi pa bin cu un campaña anual pa stop cu abuso di mucha.

E ta haya cu tanto hoben como adulto no ta suficientemente conciente riba cierto cosnan manera kico nan ta wak of considera como abuso di mucha. Tin cierto cosnan cu nan no ta kere cu ta abuso, pero cu na termino largo si ta bira abuso. Pesey ta hopi importante pa ta conciente di esaki, y reconoce tambe, y pesey a bin cu e bunita campaña cu por a duna siguimento.

Di parti di Marceylaine Paskel, el a splica cu e nomber “Un soño pa Aruba” a wordo inspira pa Miguel, pasobra nan kier mira un Aruba sin abuso ni negligencia di mucha.

Nan a pidi crèche, alumnonan di scol basico y MAVO pa participa y pa tur mucha bisti na blou, y traha posters di con mester stop abuso y negligencia di mucha, pa wordo mustra den e Fundacion su facebook page, y esun cu haya mas “like” lo haya premio.

Y tambe nan a invita hendenan cu ta traha den organizacionnan join e campaña aki, maske cu nan no tabata pa gana premio cu ta mas pa mucha y hoben, pero si pa mira un Aruba cu ta para pa derecho di mucha.

Asina por a mira riba facebook hopi alumno y docentenan bisti na blou pa duna sosten na e campaña aki.

Seccion Hubentud den Movecion ta felicita Fundacion Respeta Mi, su Stageairenan Miguel y Marceylaine, y tur scol, instancia y individualnan cu a participa, pasobra HDM tambe ta comparti e soño di kier mira un Aruba sin abuso ni negligencia di mucha!