"Mester pone diferencianan un banda ora mas nos pais tin mester di dje"

Gobernador:

ORANJESTAD (AAN): Diamars un biaha mas a tuma lugar apertura oficial di Aña Parlamentario Nobo, e biaha aki tabata di 37 biaha cu esaki a tuma lugar.

Manera ta e custumber, Gobernador a tene un discurso den Parlamento.

Gobernador Alfonso Boekhoudt den su discurso a papia riba e hecho cu tur cos ta indica cu nos turismo ta sigui bay den bon direccion.

El a bisa si cu pa loke ta e situacion financiero y social di nos pais, esaki lo tuma algun tempo pa recupera.

Gobernador a splica cu ainda tin varios hende cu no a cura por completo di e situacion cu e pandemia a trece cune.

El a splica cu specialmente muchanan, nos grandinan y personanan cu un limitacion a sufri na un manera silencioso durante e pandemia.

Gobernador a trece dilanti tambe cu na Aruba mester di mas union, respet y solidaridad pa nos pais sinti un mehoracion.

Gobierno tin mester di disciplina financiero y tin mester di mas inversion local, pa asina nos pais por recupera por completo.

“Desafio y contratemponan lo sigui y pesey ton mester di un reforma structural”, segun Gobernador.

El a splica cu Gobierno a logra reduci gastonan y a haya mas entrada, door di e sistema di impuesto.

Mester traha si riba reduccion di gastonan di debe y interes.

Gobernador a splica cu pesey tambe Gobierno ta trahando riba mas cu 60 punto di accion.

El a duna di conoce cu algo positivo ta cu den presupuesto di 2023 tin varios miyon florin destina pa proyectonan.

Gobernador a enfatiza cu ta hopi esencial pa den nos pais tin union, solidaridad y respet, pasobra esaki ta clave pa recuperacion genuino di nos isla.

“Mester pone diferencianan un banda, ora mas nos pais tin mester di dje”, segun Gobernador.