El a habri su hala y bula bay ora biento di tormenta a lanta???
*E caso por wordo resumi como un fiesta den un rio di oro
*E avestruz cu su cabez den santo y no ta mira, ni tende ni papia!
ORANJESTAD(AAN)—Ora e caso pa prome bez a bini dilanti, publico tabata tin e tendencia di mira Benny Sevinger como e avestruz, cu mester a vigila e interes di Aruba den asuntonan relaciona cu tereno.
Sinembargo, ora e proceso a culmina y e ultimo trayecto pa yega na un veredicto, un conclusion di e caso, a wordo encamina, Husticia a cualifica Benny Sevinger como un haraña den un network di actonan criminal.
Crimen organisa a bira uno di e acusacionnan contra Benny Sevinger cu ta wordo mira como e figura central den un paisahe di corupcion y awa pa laba placa.
Den Corte di Husticia, paso a paso ta entrega Pueblo di Aruba e bista total di e acusacionnan contra Benny Sevinger y asina publico por yega na resumen di cada aspecto relaciona cu e caso sumamente serio.
Den apertura di e caso, Benny Sevinger ta wordo pinta como e haraña cu paso a paso ta construi su cas, su “network” cu ta consisti di “family and friends” e grupo intimo di su partido.
Aruba ta cera conoci cu un grupo di persona considera acusado, participante na loke por yama un fiesta den cual placa ta cay for di piñata pa campaña politico di partido.
Na salida por scucha con un acusado ta splica cu el a hinca placa den e lucha di Benny Sevinger pa haya voto durante eleccion pasobra e ta kere den Benny y e lider di partido di Benny, cu ta Mike Eman.
Ta su derecho sagrado naturalmente pa kere den Benny y Mike y ta na Huez pa dicidi kico por a bay robez despues y si algo a bay robez a base di e amistad entre Benny y algun representante di e grupo financieramente poderoso di Aruba.
Ta na Huez pa dicidi kico a pasa realmente den e caso Avestruz, cu ta papia pues di un parha cu ta dera su cabez den santo y asina ta hiba nos na e expresion cu e no a tende, e no a mira y e no a papia.
Un situacion cu ta wordo ilustra tambe den tres macaco cu nunca a tende, a mira ni papia.
Benny Sevinger na cierto momentonan tambe no ta mira nada malo y tambe ta crea e impresion cu den su memoria cierto cosnan no ta warda.
Pero Benny Sevinger a bay di acuerdo cu el a firma tur documento cu a wordo entrega pa firma pasobra e tabata considera (y asina mester resumi) cu el a bira Ministro pa firma loke pone su dilanti.
Awor e pregunta ta keda. Benny tabata e haraña cu segun acusacion a traha un neishi cu ni e lama bruto entre Aruba y Curacao no por a kibra.
Kende tabata e Avestruz? Kende no a mira, no a scucha y no a bisa nada?
Esaki pa nos ta keda e parti mas misterioso di un caso, cu ta basa riba un fiesta cu placa den seno di “family and friends” den e mundo politico di Aruba.
E avestruz a habri hala y bula bay? El a desaparece ora eleccion di 2017 a pone fin na fiesta di Family and Friends, cu ta base di e acusacion historico den Corte di Husticia?
Nunca mas a mira e avestruz na Aruba of mester conclui cu pasobra su cabez a keda den santo, no por reconoce e avestruz?
Pa resumi e prome conhunto di e caracter unico di e caso aki, e falta di e figura perfecto di e Avestruz, ta bini dilanti.
Si Husticia a yama e caso Avestruz pa motibo di comportacion di hende, kende tabata e avestruz? Un contesta, cu ainda nos no por duna y cu por hiba nos na Benny aunke el a admiti cu e conoce su friends, pero no ta di acuerdo cu nan a haci algo malo.
