Mester inverti den industria tecnico pa Aruba pa crea mas  posibilidad pa esnan cu kier bin bek Aruba

ORANJESTAD (AAN): E reunionnan cu diferente stakeholder a continua Diamars, unda cu Formador  Evelyn Wever Croes a reuni entre otro cu Asociacion di Ingeniero y Arquitectonan Arubano.

Durante un conferencia di prensa, Rubiela Lampe, un di e representantenan di e asociacion a hiba palabra.

Lampe a trece dilanti cu e reunion tabata hopi ameno.

“Loke nos a palabra ta cu nos lo sigui traha riba e puntonan cu a wordo presenta”.

E parti di registro di arquitecto y ingenieronan locual ta hopi importante, pasobra e ta pa proteha nos profesionalnan Arubiano y tambe e ta duna esnan cu a bay studia afo un mihor speranza, cu ora nan bin bek Aruba nan por haya un trabao riba e isla aki, segun Lampe.

El a sigui bisa cu ta hopi importante pa sigui desaroya y sigui inverti den industria tecnico pa Aruba, pa asina tin mas posibilidad y speranza pa esnan cu kier bin bek y traha pa nos isla.