Prome cu nan a sali pa emergencia - ORANJESTAD (AAN): E barco di Defensa Hulandes, esta Zr.Ms. Holland entretanto ta ful swing cu e yudansa di emergencia na Haiti.
E barco di patruya a sali dia 20 di Augustus pa bay urgentemente e isla, cu a keda asota pa un teremoto. Net prome cu esey, Marina Hulandes den algun dia a sa di kita mas cu 2.160 kilo di cocaina for di riba mercado. Esaki a socede durante un relacion di colaboracion guia pa Merca cu ta enfoca riba e lucha internacional contra droga.
E captura di e contrabanda apenas riba Diaranson a keda divulga door di Defensa Hulandes.
Un di e intercepcionnan tabata posibel despues di un tip di Guardacosta Region Caribe. Esaki a descubri un speedboat tipo Go-fast sospechoso. E helicopter maritimo di combate NH90, cu ta abordo di Zr.Ms. Holland, a lanta vuelo pa move den direccion di e Go-fast.
Pero e narcotraficantenan riba e Go-fast no kier a stop riba señalnan di oficialnan. Nan tabata sigui core cu velocidad halto, y alavez a cuminza tira bulto den lama.
E ora cu un francotirado di Infanteria di Marina consecuentemente a dispara riba tur 3 Outboard Engine di e boto y a saca nan for di funcion. Asina a saca nan for di servicio.
Unavez cu a logra stop e ‘Go-fast’, un ekipo combina di Guardacosta Mericano y Cuerpo di Marina a subi bordo di e speedboat. E ekipo a bira bek y saca e bultonan di droga cu a ser tira den lama for di awa. Tabata trata di mas cu 1.000 kilo di cocaina.
Mas droga: Despues di esaki, DIARIO a compronde cu e barco Zr.Ms. Holland tabata envolvi den un captura di mas o menos 800 kilo di cocaina. E droga aki tambe tabata a bordo di un speedboat tipo Go-fast. Despues di un tip, e barco Holland a nabega bay riba nan.
E destacamento legal di Estados Unidos a logra exito den e intercepcion aki y a confisca e cocaina.
Algun dia despues atrobe bingo! Un biaha mas e barco di Marina a pone e Helicopter NH90 lanta vuelo pa yuda obliga un Go-fast pa e stop. Esey a logra despues di señalnan pa stop y tironan di advertencia. Un biaha mas e narcotraficantena a trata na scapa nan peyeho door di benta 360 kilo di cocaina den laman, cu despues a ser saca for di den laman. E sospechosonan despues a keda entrega den man di Wardacosta Mericano.
Tur e sospechosonan y e droga finalmente a keda entrega na US Coast Guard pa persecusion na Estados Unidos.
E tres capturanan a keda haci den lapso di 1 siman. Tabatin un di 4 captura di 1.325 kilo di droga, pero esei a keda menshona anteriormente caba. E frecuencia di e cuater capturanan di droga den un siman mester keda califica como algo unico.
