Het Arubaanse Padvindsters Gilde ta honra memoria di Grace Maduro

Den nomber di Het Arubaanse Padvindsters Gilde (APG) nos organisacion “Girl Guide Scout”, a desea di dirigi nos mes, p’asina honra nos Presidente Sra. Grace Maduro.

            Den e ultimo siman, cu transicion di Grace, e poco hendenan na nos dushi isla cu ainda no tabata conoce Grace, a sera conoci cu n’e, a bib’e, a apreci’e y admir’e pa tur locualnan el a haci atrabes di prensa y medionan social. Pues pa ripiti esaki, no ta necesario. Si mi kier para keto un rato na e trabounan cu nos organisacion ta desplega na bienestar di nos mucha-, hoben-, adolescente- y hasta adultonan den nos comunidad formando parti tambe di un organisacion (WAGGGS) internacional cu un miembrecia den mas di 146 pais .

            Dia cu Grace a mustra su disponibilidad pa traha pa nos organisacion boluntariamente, no tabata necesario pa duna mucho splicacion di e mundo di scoutismo ja cu el a experencia esaki tambe cu Ricky y Rebecca den un organisacion similar. E diferencia ta cu nos organisacion ta traha solamente pa mucha muhernan; no pa discrimina pero pa duna e mucha muhernan oportunidad pa gosa den actividadnan amical, alegre y aventuroso sin sinti incomodo y ser nan mes. Tur esaki pa e mucha muher siña vocifera su mes y empoder’e pa ser un mihor persona unda cu e ta.

            Grace tabata un persona hopi inteligente, cu hopi experencia personal/laboral sin lubida creatividad y amor pa naturalesa cu no tabata ked’afo. Di tur organisacion cu el a forma parti, el a usa e conocemento di un pa cu e otro p’asina logra yega na e metanan di cada organisacion den cual el a labora, incorporando alabes su famianan. Bibi p.e. tabata haya peticion di su ‘baby sister’ pa eherce tarea di fotografo den nos actividadnan cu cierto tareanan specifico caminda expresionnan di e mucha tabata prevalece. E tabata encanta pa sinta admira cada un di e potretnan ey y describi e mucha su apariencia cu un sonrisa ariba su cara (pic di un Beyisima na un marcha).

            Asina e tabata experencia actividadnan, studia nan na su manera visionario p’asina por mehora esaki na un manera mas simpel y practico (un di Grace su caracteristicanan), involviendo e persona di mas humilde t’e cu gobernador di nos pais. Proyectonan caminda su experencia personal mester sirbi pa e mucha por ser y biba mas felis. Esaki el a haci t’e na su ultimo rosea – na moda di papia – logrando e codigo na bienestar di nos muchanan y leerorkest cu sigur e tabata desea pa envolvi esaki den nos organisacion  tambe.

            Y no bis’e cu e mucha/hoben ey no por; ‘claro cu nan por’ tabata semper su contesta afirmando su creencia den habilidad di cada un di nos mucha-/hobennan. Aki mester menciona tambe su conviccion pa cu su yiunan cu por dirigi e negoshi di famia Fantastic Garden.

            Orguyosamente e ta expresa: ‘anto haci mihor trabou cu nos mes a haci’. Internacionalmente tambe Grace a kere den hobennan cu awe ta gradici pa  e inspiracion cu nan a haya for di dj’e. Ta nos mester extende nos man na nan, duna nan e espacio, guia, motiva y demostra nan nos confiansa, p’asina nan por haci e trabou incorporando e modernismo aden.

Ta nos tarea pa continua cu e legado cu Grace a laga nos cu n’e.

            Nos motto ta: semper prepara, aunke nos no tabata prepara pa Grace su partida terenal asina repentino. Grace, un gratitud di curason pa tur loke nos a logra pa A.P.G. su miembronan, trahando incansablemente. Sigui guia y lusa nos – na unda cu bo por ta – pa semper nos keda duna lo maximo di nos mes, na bienestar di nos mucha- y hobennan femenino. 

Drumi dushi, nos amiga pa Semper … Saluut! 

Het Arubaanse Padvindsters Gilde 

APG Board and Leaders