Merca y Aruba a firma acuerdo nobo di Preclearance

ORANJESTAD (AAN): U.S. Customs and Border Protection (CBP) a firma un acuerdo nobo di Preclearance cu Aruba, pa fortalece siguridad y modernisa biahamento entre e dos paisnan.

   E firmamento di e acuerdo importante a tuma luga dia 24 di oktober 2025 durante un ceremonia na Hyatt Place na banda di Aeropuerto Internacional Reina Beatrix na Oranjestad. E acuerdo nobo a keda firma pa Diane J. Sabatino, Executive Assistant Commissioner di Office of Field Operations (OFO) di CBP y pa Prome Minister di Aruba, Michiel ‘Mike’ Eman. E acuerdo nobo ta reemplasa e acuerdo di Preclearance di 1994, cu tabata prome cu e formacion di U.S. Department of Homeland Security (DHS) y CBP.

   “E acuerdo aki ta un logro pa ambos pais, fortaleciendo nos relacion, siguridad y facilidad di acceso pa ambos nacion,” segun Prome Minister Mike Eman, Prime Minister di Aruba. “Den fondo di e cooperacion aki ta e buskeda di felicidad comparti, e buskeda pa e  bienestar comun, cu ta e forsa cu ta uni nos pueblo pa crea oportunidadnan y forma di colaboracion cu ta bay mas leu cu frontera. E ideal comparti aki ta locual ta haci aliansa manera esaki posibel.”

   Prime Minister Eman a continua: “e firmamento di awe tin un significado hopi personal pa mi. Mi ta corda cu emocion con mi ruman difunto, Henny Eman, Aruba su prome Prome Minister, a trece U.S. Preclearance pa Aruba na 1987. Pa nos para aki awe, firmando un renobacion y modernisacion di e acuerdo historico aki di cooperacion, ta algo profundamente emocional. Ta un tributo na su vision y legado, y un honor pa haci esaki na su memoria, den e aña cu el a fayece.”

   “E acuerdo aki ta extende nos cooperacion mutuo den area di siguridad y ta conmemora casi 30 aña di operacion di Preclearance na Aruba,” Diane J. Sabatino, Acting Executive Assistant Commissioner pa Field Operations di CBP a indica durante e ceremonia. “Awe ta representa un punto di referencia importante den nos colaboracion estrecho, ora cu nos ta crea un cuadra modernisa pa operacionnan di siguridad di frontera, aumentando nos alianza integral via aumento di biahe y un experencia miho pa pasaheronan.”

   Operacion di Preclearance a inicia na Aruba na 1996, haciendo Aruba un di e 15 aeropuerto den seis pais, cu ta inclui Bahamas, Bermuda, Canada, Irlanda y United Arab Emirates cu tin e preclearance Americano. E programa ta permiti oficialnan di CBP pa haci e mes trabao di inmigracion, aduana y control agricola cu normalment ta tuma luga na Merca, pero na aeropuerto den otro pais, pa identifica menazanan prome cu nan yega na teritorio Mericano.

   E reafirmacion aki entre e dos paisnan ta amplia e relacion fuerte y stabil, habriendo oportunidadnan pa cooperacion mas profundo den siguridad fronteriso cu beneficio mutuo.

   Ramon “Chico” Negron, Consul General di Merca na Curaçao y U.S. Mission pa Caribe Hulandes incluso Aruba, a expresa su aprecio pa e cooperacion di hopi aña entre Merca y Aruba, cu pa e ocasion aki lo yuda fortalece siguridad fronteriso y facilita biahe pa e miyones di Mericano cu ta bishita Aruba.

“E acuerdo aki lo yuda promove un biahe sigur entre Aruba y Merca y lo duna sosten na turismo y aviacion den ambos pais.”