Comite Olimpico di Aruba tambe a reuni cu CONCACAF y AVB

ORANJESTAD (AAN): E siman aki, Comite Olimpico Arubano (COA) a ricibi bishita di e “The Confederation of North, Central America and Caribbean Association Football” (CONCACAF).

E bishita aki a conta cu presencia di presidente di CONCACAF, Sr. Victor Montagliani y su ekipo, ademas di miembronan di directiva di Arubaanse Voetbal Bond (AVB) cu presidente Randolf Lacle liderando e delegacion.

   E reunion aki tabata uno sumamente placentero, unda a intercambia hopi storia di trabaonan interesante y positivo cu ta tumando luga den e mundo di futbol den region y localmente. Sr. Montagliani a duna di conoce di mira un bon desaroyo pa cu futbol na Aruba y ta apoya e maneho actual cu ta traha na bienestar di e deporte.

   Di e otro banda, COA a duna di conoce di mira AVB como un federacion miembro cu ta participa activamente den tur actividad pa dirigentenan di COA y ta contento pa mira cu como organizacion a presenta recien nan plan strategico. Manera ta conoci, COA a traves di e direccion di desaroyo su curso di “Capacity Building Training” ta encurasha federacionnan deportivo local pa traha cu un plan strategico pa asina eleva e nivel di maneho.

   COA ta gradici CONCACAF y AVB  pa e bishita ameno y ta contento pa mira un bon relacion entre e federacion local y e confederacion regional, cu sigur ta den beneficio di futbol na Aruba.