Errol De Freitas (SNBA):
* E discusion no mester ta ken a firma, pero e siguridad di autonomia di Aruba
ORANJESTAD (AAN): President di San Nicolas Business Association (SNBA), señor Errol De Freitas recientemente den un entrevista cu DIARIO, a splica riba e posicion di SNBA riba e tema di Rijkswet HOFA mirando cu ainda tin hopi duda den pueblo como tambe diferente opinion riba loke Rijkswet HOFA ta y con esaki por afecta of con e por beneficia Aruba.
Señor De Freitas a remarca cu SNBA ya a scucha opinion di diferente Fractie den Parlamento y tambe a scucha posicion di Gobierno diahuebs ultimo. Segun De Freitas, ta importante pa scucha y sa pa asina por tuma e miho stap.
El a menciona riba e hecho cu Aruba tin Status Aparte pa 40 aña. Y no a yega ainda na un balance. Historicamente, ainda Gobierno ta trahando den negatief. Esaki, segun De Freitas, ta un critica constructivo cu ta conta pa tur gobierno cu a goberna e ultimo añanan. Ta momento di mara faha pasobra, segun De Freitas, tur cos lo bay cay riba pueblo bek.
Segun De Freitas, Aruba tin mas o menos 93% di mineral den nos awanan teritorial y ta cuestiona e relacion di e empuhe di e rijkswet di parti di Hulanda versus e miniralnan den subsuelo. El a bisa cu unabes cu Aruba tin mineral den subsuelo Aruba lo ta miho para financieramente. E pregunta ta keda, na ki manera of cuanto Gobierno di Aruba ta bay compromete autonomia di pais Aruba.
Teniendo cuenta cu e diferencia di opinion entre gobierno y partidonan politico, SNBA a considera pa bin hunto cu demas gremio sindical y comercial pa entre nan papia riba e rijkswet, bin cu nan analisis y forma nan propio opinion. “Importante ta cu a yega e momento pa stop e discusion di ken a firma y ken no a firma, pasobra na final, ta pueblo tin cu carga e consecuencia. Mi conseho na Gobierno y tur partido politico, ta pa uni pa e causa aki pa nos sali bon for di esaki. Ban tuma decision cu no lo bay compromete autonomia di nos pais”, De Freitas a enfatisa.
E president di SNBA a indica cu invitacionnan pa e reunion cu demas gremio lo wordo manda y probablemente lo tuma luga fin di e siman benidero. “Aruba ta nos. Aruba no ta gobierno so. Gremionan tin nos responsabilidad pa asegura cu nos gobernantenan ta bay tuma e miho decision y scoge e caminda cu ta bon no solamente pa e caha di gobierno, pero pa alivia pueblo y trece siguridad pa nos autonomia”, señor Errol De Freitas a enfatisa.
